De Rieverst

Uut Wikipedia, de vrye encyklopedy
Nå navigaty springen Nå söken springen
Hervörmde karke van De Rieverst

De Rieverst of 't Rieverst (Nederlaands: IJhorst) is een dörp in de gemiente Stappest in de Nederlaanse previncie Aoveriessel. 't Dörp lig in 't Riestdal op de grèenze van Aoveriessel en Drenthe, krek onder 't Drèentse dörp De Wiek. 't Hef 1500 inwoners (2019). Mit de dörpen Stappest en Roevène en de buurtschoppen Hamingen, Haalfweg, De Punt en Lankhorst vörmt De Rieverst de gemiente Stappest.

Ontstaon[bewark | bronkode bewarken]

Mit de ontginning van 't bosgebied wördden anevöngen rond 1100. 't Veurnaamste gewas det de lu bebouwden was rogge. In 1236 stichtte de bisschop van Utrecht op de plekke van 't hudige dörp de parochie Restina, een Latiense verwiezing naor 't hier stromende reviertien de Riest). De parochie mit heur karke völt onder 't Zwartewaterklooster bij Asselt.

Mit de uutbreiding van de ontgonnen gebieden wördden de parochie in tweien esplitst. Zo ontstunden Aoverriest en Ter Iewehurst (later Nederriest). Iewe is de Nedersaksische name veur de taxusboom, die hier vanolds gruide. Ter Iewehurst wördden in de volksmond De Rieverst en wördden in 't Nederlaands ummezet naor IJhorst. Ie woont in de Rieverst of an de Rieverst. Iene van de Rieverst het een Rieverster.

Karke[bewark | bronkode bewarken]

Plaatsnaambörd De Rieverst, meie 2020

An de Rieverst stiet een middelieuwse karke mit een lösstaonde klokkestoele. De oorspronkelijke karke stamt uut de 13de ieuw; in de loop van de tied is e meermaols verbouwd of herbouwd. In 1823 wördden de hudige, grotere karke um de muren van de olde karke hen ezet. In 1995 is dit gebouw erestaureerd.

De karke is in gebruuk deur de hervörmde gemiente IJhorst/De Wiek. 't Dörp wik wat karkelijkheid angiet slim of van de rest van de gemiente Stappest: 't is veule minder orthodox.

Veurzienings[bewark | bronkode bewarken]

De Rieverst hef een köppel campings binnen de grèenzen (onder aandere De Witte Bergen, De Vosseburcht en De Braamsluiper), mar der is haoste gien middenstaand meer. Wal is der de eerste zaoterdagmörgen van iedere maond een wied en zied bekende rommelmarkt.

Der is iene basisschoele, OBS De Iekmulder. An sportveurzienings bint der een sporthal, een voetbalveld daor as VV IJhorst speult, en volleybal-, gymnastiek- en biljartverienings (NOAD: Nooit Opgeven Altijd Doorgaan).

't Voetbalveld was in 1963 anleidige veur een slimme rel tussen de bevolking van De Rieverst en 't gemientebestuur van Stappest. De raod, die voor een groot deel uut SGP-leden bestund, verbeud VV IJhorst 't voetballen op zundag. Daor kwaamp hiel wat drokte van, waordeur De Rieverst en Stappest de wereldmedia ehaald hebt.

Taal[bewark | bronkode bewarken]

De streektaal van De Rieverst is 't Zuudwest-Zuud-Drèents, det bij 't Nedersaksisch heurt.

Citaot[bewark | bronkode bewarken]

Waor langs Drente een mooi riviertien stroomt
Waor um grune weide hoge bomen zoomt
Waor nog meinsen woont die tevreden bint
Daor lig 't Rieverst, dorpien waor ik geboren bin

Uut Het Rieverst Dorpien deur Arend Klomp

Uutgaonde verwiezing[bewark | bronkode bewarken]

Nuvola apps ksig.png Dit stok is eschreven in 't Zuudwest-Zuud-Drèents.