Beentjesgraven

Uut Wikipedia, de vrye encyklopedy
Nå navigaty springen Nå söken springen

De Beentjesgraven, eerder ok d'Olde Gracht enuumd, is een middelieuws ofwateringskenaal in 't noorden van de Nederlaandse pervincie Aoveriessel.

Ligging[bewark | bronkode bewarken]

De Beentjesgraven löp van ongeveer De Balk (waor 't kenaal naor 't zuden richting Vechte deurlöp as de Stouwe) in 't noordoosten töt De Meele in 't zuudwesten (waor 't uutmondt in de Dedemsvaort en de Buldersleiding). 't Kenaal lig net ten noorden van de N377, die op zich weer 't tracé volgt van de diels verdwenen Dedemsvaort. De stroomrichting is van 't oosten naor 't westen: allennig al de vroggere gemiente Neilusen hef van noordoost naor zuudwest een heugteverschil van 3,7 meter.[1] Vrogger leup de Beentjesgraven westerd uut deur töt Asselt, waor later de Dedemsvaort zol lopen, en dan noordelijk töt bij De Sluus.[2]

Geschiedenis[bewark | bronkode bewarken]

De oldste vermelding (1413) sprek van de Berendesgraven, wat döt dèenken det 't kenaal een graafwark is daor as iene Berend wat mit van doen had, en det de vörm "Beentjesgraven" een latere Hollaandse verbastering is. In det jaor, blek uut 't archief van 't Zwartewaterklooster, wezen de arfgenamen van de marke van Roevène en de marke van Dalsen 't kenaal an as markegrèenze: "Den Hoidijk up Berendesgraven daer van voirt up an des Bisschopsgraven als die langes wijze toenerwaert".[3] Hier leup later ok de grèenze tussen de gemientes Stappest en Neilusen. Op een kaorte van tussen 1724 en 1755 deur laandmeter W. Hattinga of ien van zien zeuns, D.W.C. en A. Hattinga, stiet de "Beenties Graven" inetiekend.[4]

Aover de Beentjesgraven en nog een aander, zudelijker kenaal, de Grote Hermel, kwamen ze in vrogger ieuwen vanuut Zwolle en Asselt in kleine booties törf halen uut 't grote vene det hum uutstrekte an weerskaanten van de Riest. De beide stroompies waren daor belangriek veur, want vervoer aover laand was nauwelijks meugelk.[5] In de eerste helfte van de 19de ieuw is 't gebied beter ontsleuten deur de anleg van 't grotere kenaal de Dedemsvaort. De ligging van de buurtschop Den Hulst ('t latere Neilusen-Noord), die al lange veur 't uutgraven van de Dedemsvaort bestund, hangt samen mit de loop van de Beentjesgraven.[6]

Det de Beentjesgraven een vervoersaoder ewest hef, kuj opmaken uut 't jaagpad det nog langs een diel dervan löp en det now toegaankelk is veur kuiervolk.

Rifferenties[bewark | bronkode bewarken]

  1. Canon van Neilusen
  2. Kaorte van Aoveriessel deur Nicolaas Ten Have uut 1648
  3. J.P. van den Berg c.s. (1986), Van Reestdal tot Beentjesgraven. Van Kievitshaar tot Kievitsnest, Zwolle: Natuur en Milieu Federatie Overijssel, blz. 155
  4. Marian Pereboomen Freek Pereboom (1982), Nieuwleusen in de kaart gekeken, Kampen: Iesselakkedemie, kaorte 7
  5. Canon van Ni'jlusen
  6. Canon van Neilusen
Nuvola apps ksig.png Dit artikel is eschreven in 't Zuudwest-Drèents.