Baas Boppe Baas

Uut Wikipedie, de vrye encyklopedy
Naar navigatie springen Naar zoeken springen

Baas Boppe Baas (Fries veur: baos boven baos) was een Friese dramaserie van bedaenker en regisseur Steven de Jong. Van 2001 tot 2005 wodde de serie, bestaonde uut ofleverings van 30 menuten, uutzunnen deur Omrop Fryslân.

Baas Boppe Baas gong over de konservatieve pater familias Beant Baas (espeuld deur: Rense Westra) en zien meer veuruutstrevende femilie. Beant het roggeklachten en zit in de WAO. Hi'j is wel aktief as heufdredakteur en kolumnist van de dörpskraante. Beant is trouwd mit Joukje (espeuld deur: Hilly Harms).

Zeune Sjoerd (espeuld deur: Thijs Feenstra), schoondochter Talieta (espeuld deur: Meriyem Manders) en heur dochtertien Cynthia (espeuld deur: Thirza Koopmans) wonen ok in et huus van Beant en Joukje. Sjoerd is dieredokter en het zien praktiek an huus.

Dochter Afke (Lianne Zandstra) woont in et westen van et laand en komt altemet op bezuuk. Bennie (speuld deur: Wybe Bruinsma) is de buurjongen van de femilie Baas. Hi'j is krekt as Beant stamgast van et dörpskefé.

De eerste serie wodde vanof 13 november 2001 uutzunnen. De in december uutzunnen ofleverings wodden mit 130.000 kiekers uutzonderlik goed bekeken. D'r kwam ok een twiede en dadde serie en in et seizoen 2004-2005 volgde de vierde en laeste serie. Vanof november 2004 wodde de dramaserie mit ondertiteling uutzunnen deur Overiesselse regionaole omroep RTV Oost en laeter ok deur BVN, de Nederlaanse en Vlaamse omroep in et butenlaand.

In de zoemer van 2005 wodde de serie ok op 'e laandelike tillevisie (Nederlaand 1) uutzunnen. De serie Baas Boppe Baas geldde ok as veurbeeld veur inkelde dialektseries as de Twentse serie Van Jonge Leu en Oale Groond en de Limburgse serie De Hemelpaort.