Erica (Drenthe)

De locatie van Erica in de gemiente Emmen

Erica is een dorpie in de gemiente Emmen, pakweg tien kilemeter bezuden 't centrum van Emmen. De N37 löp deur dit dorp.

Ontstaon

Erica ontstund as boekweitkelonie op de hoagere zaandgronden. 't Gruujde uut töt een echte veenkelonie toen umdebij 1863 de Oogeveinse Vaort klaorkwam. 't Centrum kwam toen an 't kenaal te liggen.

De eerste luu die as op Erica woonden binnen kenaolgraovers west die zich in 1863 nao 't klaorkommen van de Bladderswiek (een verlenging van 't Oranjekanaal) net bezuden 't Oranjekenaal bij Zuudbarge wollen vestigen. Ze worden vot jaagd deur de Zuudbarger boeren, die heur een end wieder wolden hebben. Zo kwammen ze een paar kilometer wieder naor 't zuden bij de uutlopers van de Hondsrug.

De mieste kenaalgravers waoren niet drok op dit plekkie en gungen trugge naor Slagharen waor dat ze wegkwamen, mar twie femilies, die van Geert Tien en Anton Lipholt, binnen bleben. Dizze femilies kwamen uut Duutslaand en trokken laangs Slagharen op Zuudoost-Drenthe an um kenalen te graoven. Um dizze reden binnen völle luu op Erica nog katteliek (44%).

In 't zölfde jaor kregen nog drie femilies uut Slagharen heur stee op Erica: de femilies van Geert Veltrop, Frans Fahrweg en Hendrikus Kotterink. Dit waoren boekweitboeren die verhuzen mossen umdat d'r ien de contreien van Slagharen gien veen meer over was um boekweit op te verbouwen. Dizze gezinnen hadden aordig wat kinder, waordeur d'r al een hiele nederzetting ontstund.

Dizze mensen hebben hun gehuchie de name geben van de plaotse waor dat ze weg kwammen, dus Nij Slagharen. Mar de borgemeister van Emmen, Mr. Lucas Oldenhuis Tonckens, hef 't dörp definitief Erica enuumd, de Latiense name veur döpheide.

In 1902 kreeg Erica een verbinding per stoomtram toen de DSM 't spoor van Nei-Amsterdam naor dizze plaots anlegde. De lien wordden op 't end deurtrokken naor Troapel. In 1947 kwaam 'r een end an 't vervoer mit de stoomtram.

Teengswoordig

Erica hef umdebij 4800 inwoners, waor dat zo'n 1200 van jonger as 18 binnen. Völle van de kinder binnen bij de scouting of op een sport. D'r binnen sportvelden, een uutbreide sporthal en een zwembad, die as stichting hielemaol deur de luu op Erica betaald wordt.

De mieste mensen op Erica warken in de glastuunbouw. D'r is ok een groot bedrief dat kassen bouwt. De aanderen warken bij kleinere bedrieben, in de detailhandel of nog aans.

In 't laand kennen de mensen Erica as 't dorp waor dat de Drentstalige popgroep Skik en zien zanger Daniël Lohues zien stee hebben.

Keuningin Beatrix hef Erica op dartig oktober 1998 mit rubberstiefels an bezöcht tiedens de gloepense wateroverlast in 't tuunbouwcentrum. Een dag eerder was de toenmaolige premier Wim Kok al op Erica.

Commons: Erica (Drenthe) - plaatjes, filmkes en/of gelüüdsbestanden.

Dit stok is schreven in 't Zuudoost-Zaand-Drèents, preciezer zegd 't Ericaas