Tubbige

Oet Wikipedie, de vraaie enzyklopedie
Gao naor: navigasie, zeuk
Gemaente Tubbige
Vlagge van de gemeante Tubbige Waopn van de gemeante Tubbige
(Vlagge van Tubbige) (Waopn van Tubbige)
Lokatie van de gemeante Tubbige
Lokatie van de gemeante Tubbige
Informasie
Proveensie Oaveriessel
Heufdplaatse Tubbige
Geografie en bevolking
Öppervlakte
 - Laand
 - Water
147,41 km²
146,98 km²
0,42 km²
Inwonners
Bevolkingsdichtheid
20.671 (1 juli 2006)
141 inw./km²
Koördinaoten 52° 24′ N, 6° 46′ OKoördinaoten: 52° 24′ N, 6° 46′ O
Aoverig
Belangrieke verkeersaoders N343, N349
Netnummer 0541, 0546
Postkode 7614-7619, 7650-7669, 7679
Offisiële webstie www.tubbergen.nl

Tubbige (ok: Tubbig, Tubbargn of Tubboargn, Nederlaands:Tubbergen) is ne gemeente in t noordn van Tweante (proveensie Oaveriessel). Op 1 juli 2006 har de gemeente 20.671 inwonners (bron: CBS) en ne öppervlakte van 147,40 km². De gemeente Tubbargn maakt deel oet van de plusregio Regio Tweante.

Ut doarp en de gemeente hetn vanoalds Tubbige. Ut tamelik nieje Tubbargn is ne vertweantsing van de officiële Nederlaandse naam Tubbergen. In t gemeentewoapn stoat dree goaldn bargn, ne verwiezing noar de naam Tubbergen. Mer umdat de naam vanoldsher Tubbige en nich Tubbargn is, steet wal vaste dat n naam van de gemeente niks met beargn (of heuvels) van doon hef.

De gemeente Tubbige völt te kenmearkn as de meest kattelieke gemeente van Nederlaand. Dit oet zich in n beheurlik massaaln kearkgaank en t heugste perceantazie CDA-stemmers van heel Nederlaand. Vuural de döarpe roond de heufdplaats Tubbargn bint hechte gemeenschopn.

Ut bekeandste in t doarp Tubbige is de Seent-Pankratiusbasiliek. De Seent-Pankratiuskaark is in t joar 2000 duur n paus Johannes Paulus II töt basiliek verheevn. De basiliek is ebouwd in neo-gotiese stijl. Vrogger stund der op dee plaats ne oaldere kaark. Nen toorn van Beantemer zaandsteenn oet de viefteende eeuw steet der nog. De neo-gotiese kaark is doar teagn den toorn anbouwd.

Den oaldn toorn is eigndom van de börgerlike gemeente, net zoas de meeste kaarktoorns in Nederland dee dateert van veur 1789. Dat t eigndom oaverging noar de börgerlike gemeente is zo reageld in de Batoafse Staatsregeling van 1789 en dit is in 1806 nog eens bevestigd deur könnink Lodewijk-Napoleon. De kadastrale tenaamstelling van n toorn op naam van de gemeente Tubbige hef trouwns nog op zich loatn wochtn töt in de joarn '80 van de twintigste eeuw.

De basiliek is veural bekend deur de glas-in-lood-raamn van vief generoasies van de glassniedersfamilie Nicolas. Disse glas-in-lood-roetn vörmdn de inspiroasie um alle joar n evenemeant in Tubbige te organiseern oonder de naam "Glasrijk Tubbergen", Glasriek Tubbige. Op dit evenemeant stelt glaskeunstners oet heel Uropa eer glaskeunst tentoon.

Ok he'j der dree schooln in t doarp: twee basisschooln, De Wiekslag en de Marke, en ne schoolngemeenschop veur veurtgezet oonderwies, t Seent-Canisius. En ok in elk van de aandere döarpe steet wal ne basisschool. De gemeente Tubbige kent gen oopnboar oonderwies. Alle schooln hebt ne kattelieke of een protestaants-kristelike achtergroond. De basisschool in t Maanderven, woar de bevolking vanolds wat meer mengd is, hef ne neutraal-biejzeundere achtergroond.

Nen bekeandn Tubbiger was de pollitieker en priester Herman Schaepman (1844-1903). Den hef völ goods doan veur de emancipoasie van de rooms-kattelieken in Nederlaand. In Tubbige steet nog n groot broonzn standbeeld van Schaepman, n kunstwark van de in zien tied beroomde beeldhöawer August Falise.

Seend zeuwn joar wörd in Tubbige alle joarn ne verlichte Karnavalsoptocht höldn. Hier komt mear as 40.000 kiekers op of oet t hele laand.

Kerne[bewark | bronkode bewarken]

De gemeente Tubbige hef tien officiële kerne (döarpe) en dree officiële boerschopn zoonder eign kern (Hoarle, Hezingn en Maander). Ut gemeentehoes steat in t heufddoarp Tubbige.

Antal inwonners per woonkern op 1 januari 2004:

Tubbige 4480
Geestern 2370
Albeargn 2120
Haarbig 900
Langeven 800
Vas 670
Reutum 660
Maanderven 630
Fleringn 480
Maander 390
Mariaparochie 320
Hezingn 210
Hoarle 130

Bron: CBS / webstie gemeente Tubbige

Gemeentebestuur

  • Börgermeister: mr.M.K.M. (Mervyn) Stegers (CDA)
  • Wethoalder: P.J. (Pieter)van der Vinne (CDA)
  • Wethoalder: H.B.M. (Henny) Oude Geerdink (CDA)
  • Wethoalder: J.E.F. (Jos) Harmelink (PvdA)

Bekeande leu oet Tubbige[bewark | bronkode bewarken]