Mirreweenterhoorn

Mirreweenterhoornbloazn

n Mirreweenterhoorn (Nederlaands: midwinterhoorn) is n oold bloasinstremeant wat nog völle wördt gebroekt in Tweante, n Achterhook, Westerwolde en sommige plaatsn in Duutslaand kort oawer de greanze. t Lik t meest op nen alpenhoorn. t Is n met de haand emaakten, lech eböagn hoorn van boarkn-, ealzn- of willingnhoolt, met n moondstuk (de happe) van vlierhoolt.

De mirreweenterhoorn is wal van hoolt, mear t wördt toch tot de kopperne bloasinstremeantn erèknd, umdè-j dr op dezelfde meneere geluud oet munn kriegn as oet nen trompet; duur spanning op de lipn te verheugn of te verleegn krie-j nen heugerden of nen leegerden toon. Op disse meneere krie-j dr ook alleenig mear natuurtoonn oet.

Gebroek

t Mirreweenterhoornbloazn hef zin oorsprong in de Germaanse joelfeestn, dee zo roond t mirreweenter (21 december) eheuldn wördn, um t duuster en kwoade geestn te verdriewn. Toew t Kristendom köm, wör t gebroek verdreeid, en wör t bloazn gebroekt um n komst van Christus an te kondigen. n Hoorn wör ook gebroekt um boskopn duur te geewn; de boern konn an t soort roop heurn wat dr an de haande was: Of dr n keend was geboorn, of dr ene in nood was en of dr vuur gevoar ewoarskouwd wör.

Meestieds wördt dr tiedens t tweeduuster ebloazn. As de vorst an de groond is dreg t geluud vearder dan as t doo is. Mangs wördt t oeteande van n hoorn op n raand van ne waterputte ezat, um zo t geluud te verstoarken. n Aandern reedn hiervuur is det t deenk nog wal zwoar kan wordn a'j lange munn bloazn. Op n doer kö'j dr zeare oarme van kriegn.

Mirreweenterhoorn as versiering

n Mirreweenterhoorn is al joarn ne völgebroekte versiering van huuze. Det kan eawngood binn as boetn wean.

Rechtevoort

t Mirreweenterhoornbloazn hef de leste joarn ne opleawing met emaakt. Ieder joar wördt r zelfs t Nasjonaal Kampioenskap Mirreweenterhoornbloazn eheuldn met ne opvalnd grote jeugdklasse. Op 6 jannewoarie 2008 (dreekeuningn) wör in Deepn t kampioenskap eheuldn. Hieran deedn zowat 80 jeugdleedn oet heel Tweante met.

Geluud

n Mirreweenterhoorn gef n hol, klaaglik geluud. Dèt het in t Tweants en t Achterhooks n Ooldn Roop. Umdèt t in de eerste plaatse n instremeant is um boskopn oawer te brengn, en nit vuur t vermaak of vuur meziek, hef iedern mirreweenterhoorn zin eegn geluud en toonn. Doarumme is n mirreweenterhoorn n solo-instremeant. t Geluud vaalt nit in aandere meziek te passen en t instremeant is doar ook nit op ofestemd. Um dezelfde reedn kan dr mear eenn tegeliek bloazn, umdet t aanders nit kleenkt.

Dr wörd nog aait edisseld of op de mirreweenterhoorn non wal of nit n melodietjen espöld mut wordn. Wat leu zegnt det t lik op n melodietjen umdet det non eenmoal t gevolg is van t verheugn van de lipspannige, mear wat leu meant det t is oet te skriewn op nen muziekbalkn:

In Grönningn

In Grönningn is t mirreweenterhoornbloazn völle meender bekeand en meender wied verspreaid, mer der zeent verskeaidene vereanigingn dee't t nog hebt duur ezat. De leaste joarn keump der steeds meer andacht vuur disse traditsie. t Wördt nog edoan in Westerwolde roond de doarpn Wedde, Jipsinghuzen en Onstwedde, in t Oldambt in of roond Finsterwolde en in t Westerkwarteer in Niekoark. De leste joarn is t bloazn ok te heurn in Veendam, woer at t nog relatief niej is. Vroger gung dit, oonder n naam Sunt-Tomas, saamn mit t gebroek dat alle jungs oet t doarp saamn t laand op gungn met peerdn, dat "Tomasrieden" eneumd wör. Dit was dan n good momeant vuur de jonge kearls um zik an de deerns te loatn zeen. Tegenswoordigs is dit leste gebroek oetestörvn.

Oetgoande verbeending

www.midwinterhoorn.nl: ne webstea met mear infermaasie oawer n bouw van n mirreweenterhoorn

Disse pagina is eskreewn en in esprökn in t Riesns