Zujelik halfroend

Uut Wikipedia, de vrye encyklopedy
De eerde vanuut t zujen
De eerde vanuut t zujen

t Zujelik halfroend is t gedeelte van de eerde in t zujen van de evenaar.

De twee werelddelen die geheel op t zujelike halfroend liggen bin Australië en Antarktika. Zuud-Amerika en Afrika liggen allebei gedeeltelik op t zujelik halfroend. t Grootste gedeelte van de oppervlakte wort in-eneumen deur oseanen; die maken n veul groter deel uut van de totaole oppervlakte as op t noordelik halfroend.

Deur de kanteling van de eerdas bin de seizoenen op t zujelik en noordelik halfroend krek aarstum. Vanof um en naobie 23 september, as de zon recht boven de evenaar staot (equinox) beweegt ie schienbaor steeds veerder naor t zujen, tot ie op ± 22 desember boven de Steenbokskeerkring staot. Disse dag is in t zujen hiervan de langste dag van t jaor, en betekent t begin van de zoemer op t zujelik halfroend. Roend 20 meert staot de zon opniej boven de evenaar en begint op t zujelik halfroend de haarst.

In tegenstelling tot op t noordelik halfroend staot de zon (behalve in t gebied tussen de evenaar en de Steenbokskeerkring, as t zoemer is) roend t mirreguur altied in t noorden, en die beweegt dus schienbaor van rechts naor links gedurende de dag.

Waor op t noordelik halfroend de Poolster as oriëntaosiepunt gebruukt kan worren, is die niet te zien op t zujelik halfroend. Hier bin enkele steernsbeelden te zien die juust in t noorden niet of haost niet te zien bin, bieveurbeeld t zujerkruus.

Dit artikel is eskreaven in et westveluwske dialekt van Putten, in de Algemene Nedersaksiese Schriefwieze.