Wearldspråke

Uut Wikipedia, de vrye encyklopedy
Nå navigaty springen Nå söken springen

Wearldspråke (mangs ok Wearldsproake) is een 'neadersassisk internettydskrivt' van de haand van de Riessense streektaalactivist Martin ter Denge (1985). Wearldspråke wil 't Nedersaksisch anfietern en uutdragen as moderne, levende taal in Nederlaand en Duutslaand.

Wearldspråke bestiet uut een webstee mit onder meer neis in 't Nedersaksisch aover diverse onderwarpen, een in juni 2018 begunde, via verscheiden platforms te beluustern podcast, en visueel materiaol op zieden as Facebook en Twitter det 't Nedersaksisch op een positieve meniere onder de andacht brengt. 't Neis det op de webstee verschient, wördt ok edield via de Facebookziede van Wearldspråke.

Een veurbield van visueel materiaol van Wearldspråke is een foto van een in de grond esteuken batse mit de leus: 'Saksies is een warktuug, gin museumstuk'.

Tweants: Wearldsproake

Achtergrond[bewark | bronkode bewarken]

Wearldspråke is voortekomen uut eerdere internetactiviteiten onder de noemer 'Tweants: Wearldsproake', toen Ter Denge besleut um zien bosschop wieder te trekken van 't Tweants naor 't Nedersaksisch in 't algemien. 't Idee det Wearldspråke consequent uutdrag, is det 't Nedersaksisch, krek as elke taal, geschikt is veur gebruuk in alle facetten van 't dagense leven, en niet mar aal in de hoek edrokt mut wörden van folklorisme en platvloerse humor. De meniere umme 't Nedersaksisch leventig te holden, stelt Wearldspråke, is deur 't te blieven praoten, 'So vöäle en so vake as et kan.'

Veur zien schrieverije (in de Riessense variaant van 't Tweants) gebrök Ter Denge de mandielig Nedersaksisch-Platduutse 'Nysassiske Skryvwyse'. In zien podcast is hij partietoeren allennig an 't woord, of mangs hef e een gesprek mit een gast. In oflevering 24, van 29 augustus 2019, had e de bekende Sallaandse rockmuzikaant Hendrik Jan Bökkers aover de vloere.

Bronnen[bewark | bronkode bewarken]

Nuvola apps ksig.png Dit stok is eschreven in 't Zuudwest-Drèents.