t Vjenne

t Vjenne, t Venne, t Vreeznven of Vreeinvenne (Nederlaands: Vriezenveen) is n doarp in de Tweantse gemeente Tweanteraand in de Nederlaandse proveensie Oaveriessel. t Lig ten noordn van Almelo. Vrogger was t ne zölfstaandige gemeente; now steet der t gemeentehoes van de gemeente Tweanteraand. Op n eerstn januari 2005 weunn der 13.371 leu in t Vjenne.

Geschiedenis

t Vjenne is ontstoan noa 1364 in de tied dat der in disse regio völle venne wördn wonn. Tusken 1720 en 1917 dreavn de inwonners van t Vjenne nen leabendign haandel met t Russiese Seent-Petersborg. In 1905 braandn n groot deel van t Vjenne plat. Now kenmearkt t doarp zik duur ne 6,2 kilometer laanke doarpsstroat.

Taal

In t Vjenne wördt n ampart Neersassies dialekt sprökn, t Vjens of Vreeznvens, dat weinig oavereen oetkömp met t Tweants dat in umlignde plaatsn sprökn wördt. t Vjens verdreeit bepoalde klaankn woar in andere soortn Tweants nen eankelklaank wörd broekt. Dit kan n oawerbliefsel wean van t Westfaals of invlood van t Freesk:

• t Tweantse oo wördt wè (Koning is Kwenning)
• oa wördt wa (oaveral oaverhen is waveral waverhen),
• ea wördt ja (Earpel etn is Jappel jatn)
• ee wördt jè (Kettel is Kjettel en Veene is Vjenne)

Disse maneere van proatn wördt hoaste neet mear broekt, en t gebroek van dialekt geet de leste joarn slim op Sallaands an.

Bekeande leu oet t Vjenne

• Gerben Löwik (29 juni 1977), beroopsfietser
• Johan Kenkhuis (7 mei 1980), zwemmer
• Manon Fokke (16 januari 1976), sund 20 september 2012 lid van n Tweeden Kamer veur de PvdA