Twaibak

Twaibak (ook: twijbak) is n lichtverteerboare stoedevervaanger. Twaibak wordt maisttied in rollen verkocht. n Rol bestaait binoa aaltied uut dartien twaibakken.

Twaibak komt aan zien noam, deurdat t twai moal bakken wordt, ain moal as plat silìndervörmeg stoedje (twaibaksbol, ook in dai vörm veur koop) ìn noa t deursnieden nog n moal. Tegenswoordeg wordt bie tieden, deur t verhollaandsen van t Grunnegs, t ook wel beschuut nuimd. Toalkundeg zain is t woord beschuut verwant aan t Fraanse biscuit en t Italjoanse biscotto, uut t Latain bis coctus, dat letterlek 'twai moal bakken' betaikent.

n Eukonomisch veurduil van twaibak is dat t bakken worden kin bie legere tìmpratuurn as stoede: n bakker kin doarom noa t bakken van stoede de restwaarmte van de oven bruken om twaibak te môken.

Twaibak mit moesies

Twaibak mit moesies (sukerde anieszoadjes) is in Nederlaand al eeuwenlaank n gerecht dat bie de geboorte van n kind eten wordt. Al in de 17e eeuw wuir kroambezuik trakteerd op twaibak mit moesies, rôze körrelchies as t kind n wichie was ìn widde körrelchies bie n jongkie. Loater wuiren de widde körrels vervangen deur blaauwe.

Leegsaksisch

Drèents:
- beschuut
- beschute
- kaai(e)
- tweibak
- twiebak
Grunnegs: twijbak, twaibak
Sallaands: beschuut, beskuut
Stellingwarfs: beschuut, bak
Urkers: kweeuwk
Veluws:
- beschuut
- beskuut (Terwolde, Attem)
- besjuut (Bunsjoten, Niekark)
- bescheut (Doornspiek)
- beschut (Nunspeet)
- tweebak (Epe, olderwets)

Schreven in t Veenkelonioals van t Knoal