Doorspiek

Oet Wikipedie, de vraaie enzyklopedie
(deurestuurd vanaof "Doornspiek")
Gao naor: navigasie, zeuk

Doorspiek (Nederlaands: Doornspijk) was n vroggere gemeente in Gelderlaand, t is noen onderdeel van de gemeente Elburg. t Antal inwoeners lag in 2011 volgens t CBS rond de 3.300. t Darp hef n antal karken mit n orthodox karakter. De grootste karke is de Hersteld Hervormde Karke.

Geschiedenisse[bewark | bronkode bewarken]

Doorspiek wordden veur t eerst vermeld in t jaor 796 as Villa Thornspiic, t is daormee een van de eerste plaotsen in t Raandmerengebied die in de annalen (n korte geschiedenisbeschrievige per jaor) vermeld steet.

Villa Thornspiic was n nederzetting mit n zekere kern, de plaotse waor de eigenaar van t laandgoed ewoend hef. Zo'n villa bestun uut verschillende boerderiejen die soms zelfs op vrie grote aofstaand van t middelpunt laggen. In t jaor 1025 gaf koning Koendert II dreje boerderiejen in Dorenspic an zien dienstman Werner. Mit disse vermelding van Doornspiek wordt n gebied an-eduuid waorvan de grenzen vastesteld wordden deur de karkelike overheid. Zo'n karkelik gebied heetten n karspel (karkespel) en bestun uut tenminsten 120 geleuvigen. De grenzen van dat karspel bin, op n paor kleine veraanderingen nao, gebruukt as de grenzen van de gemeente Doorspiek. In 1332 gebruukten de schepenen van Elburg bie n haandelsovereenkomst in t Duutse Lubeek t geheimzegel van Dorenspiet. Ze gaffen as verklaoring veur der haandelswieze: "Onze stad dreug vrogger de naam Dorenspiet". In de 16e eeuw kreeg t gebied an t einde van de Karkdiek de naam Doorspiek.

Oorspronkelik lag t sentrum van Doorspiek meer naor t noorden toe, kortbie de Sunte-Ludgeruskarke an de Zujerzeediek. Naodat de karke in 1825 deur overstreuming en blikseminslag verleuren was egaon wordden der n nieje karke ebouwd op grotere aofstaand van de Zujerzee tegenover t Arf Klarenbeek. t Sentrum van t darp kwam rond disse niej ebouwden karke te liggen. In t midden van de 19e eeuw is deur t darp, op de plekke waor t noen ligt, de Zujerzeestraotweg an-eleegd. De Karkdiek van t darp naor de plaotse waor de ouwe karke estaon hef was oorspronkelik de verbinding tussen t achterlaand en de ouwe kern an de Zujerzee. In t noorden van de karkdiek ligt t 'Goor', n sinds 1336 in arfpacht uutegeven weide- en heuigebied dat deurkruust wordt deur de 'Goorbeek'.

Nedersaksies[bewark | bronkode bewarken]

  • Veluws: Doorspiek (oek wel es uutespreuken as Doorspik)


Nuvola apps ksig.png Dit artikel is eschreven in t Oost-Veluwse dialekt van Doorspiek, in de Algemene Nedersaksiese Schriefwieze.