Thincso

Uut Wikipedia, de vrye encyklopedy
Nå navigaty springen Nå söken springen
Thincso/Týr afebealded in de Edda

Thincso of Thincsus was den name vöär nen gud uut de germaanske mytology. Hee wördt vake lykesteld an den skandinavisken gud Týr, wåras hee den söäne was van Woden en Freya. Den name kümt vöär up en paar altaarsteynder dee vünden sint in de olde romeinske upgraevingssteade Vercovicium by et britske Housestead, by de Müre van Hadrianus. De romeinen tröäken den gud lyk med öären eygenen oorlogsgud Mars, want up de steynder steyt Mars Thincsus (Mars van et Ding). Ouk steyt hyrup de eyrste vermelding van de Tvihanti, nen germaansken stam wårvan as geleyrden meynet dat se uut et nudaagse Twente kümmen.

Thincso was når alle wårskynlikheid den gud van et ding, den rechtdag/de rechtspreakerye. Hee wördt ouk wal es vereynselvigd med Saxnot, den gud van de Sassen.

Thincso was den gud den as den wulv Fenrir an en touw wüst te leggen, mär dårvöär wal ne hande afebeaten kreag. By Ragnarök sal hee Fenrir doudhauwen.

Name[bewark | bronkode bewarken]

Den oldnoorsken name Týr is döäregroid vanaf et oorgermaanske (nåbootste) woord *Tīwaz, wårby as den z in nen r untwikkelden. Den oldhougdüütsken afeleiden form is *Ziu, in et oldengelsk nöömden se emTīw of Tīg. Når em wör den darden dag van de weake nöömd: dinkseldag.

Ouk vöäle lokale steades in twente en den achterhook verwyset når dissen gud, sou as Dinsper, den Dingspelerbarg, den rivyr den Dinkel en afleidingen dårvan, mär ouk Dinxtervene.

Eigenschappen[bewark | bronkode bewarken]

Thincso is den gud achter de lyknamige rune, den T (ne upwaerse pyle). De rune T höyrt by Thincso en steyt vöär rechtvaerdigheid, selvbeheyrsking en selvupoffering. Et is ne rune vöär krygers.

Thincso is ouk den heamelvader en ne verpersöönliking van de sünne. As gud van et swaerd en de speare is hee ouk oorlogsgud. Thincso gevt recht, eyre, mood en wysheid in de stryd. Dårmed is hee tegelyke god van et ding (de germaanske volksvergådering).

An et begin van unse jårtelling was Thincso eyne van de vöärnaamste germaanske guden, te vergelyken med Zeus uut de greekske mytology. Dat versköäv later når Woden/Odin.

Ümdat Thincso ooit sou nen vöärnamen gud was, kan et good nen voordsetting weasen van nen olden indogermaanske gud. Toch solde et te makkelik weasen üm et vulleydig lyk te trekken med gudennamen as Zeus en Dyaus, en wöörde as latyn 'Deus' en fransk 'dieu'.