The Rolling Stones

Uut Wikipedia, de vrye encyklopedy
The Rolling Stones by en uptreaden
The Rolling Stones 1965: Brian Jones, Charlie Watts, Mick Jagger, Keith Richards, Bill Wyman

The Rolling Stones (De Rullende Steynder, vake ouk afkört töt The Stones) sint nen britske rockband uut Londen, upericht in 1962. Döär öär afwykende, härdere geluud as dat van andere poprock-bands in de sestiger jåren wörden se eyne van de grundleggers van de hard rock.

De eyrste stabile samenstelling van de band bestünd uut bandleider Brian Jones (gitaar, harmonika, toutsen), Mick Jagger (leidende sang, harmonika), Keith Richards (gitaar, sang), Bill Wyman (basgitaar), Charlie Watts (drums) en Ian Stewart (piano). Den lätsten wör in 1963 uut de band esat, mär bleav toch as musikant in deenst van de band töt synen doud in 1985. Jagger en Richards, de vöärnaamste skryvers van leedteksten vöär de band, nöämen de leiding do as Andrew Loog Oldham manager wör. Minder as ne månd vöär synen doud in 1969 stappeden Jones uut de band. Hee was al vervöngen döär Mick Taylor, den as der up syne böärte in 1974 weader med uutskeiden en upvolgd wör döär Ronnie Wood in 1975. Den lätsten is der noch altyd by.

In 1993 skeiden Wyman der med uut. Seyd dee tyd is Darryl Jones vasten bassist. De Stones hebbet al seyd et afskeid van Stewart in ’63 ginnen vasten toutsenist, mär se hüürt der altyd vaste musikanten vöär in, sou as Jack Nitzsche (1965 – 1971), Nicky Hopkins (1967 – 1982), Billy Preston (1971 – 1981), Ian McLagan (1978 – 1981) en Chuck Leavell (1982 – nu).

Med blues en rock ‘n’ roll as uutgangspünt begünnen de Rolling Stones nummers van anderen nå te spöllen. See löypen vöärup by de Britske Invasy, ne beweaging wårby britske bands slim popular wörden in de Vereynigde Ståten. Vöäral in de upstandige jungerenkultuur van de jåren ’60 vünden see en willend our. Et gröttere sukses küm skounwal med eygen wark. De nummers ‘(I can’t get no) Satisfaction’ en ‘Paint it Black’ wörden internationale hits. Öär eyrste vulleydig eygene album Aftermath (1966) wördt eseen as et meyst bepålende wark vöär et bandgeluud. Midden jåren ’60 deaden se noch wat knooien med psychedeliske rock, mär al rap kümmen se weaderümme by öär eygene blues-achtige geluud med Beggars Banquet (1968), Let it Bleed (1969), Sticky fingers (1971) en Exile on Main St. (1972). In 1969 wörden se vöär et eyrst ankundigd up et podium as ‘De grötste rock en rollband van de wearld’.

Gedurende de jåren ’70 en ’80 bleaven de Rolling Stones suksesvulle albums uutbrengen, sou as Some Girls (1978) en Tattoo You (1981), de twey bestverkoupenden. In de jåren ’80 gavven se wat minder uut ümdat se drukker warren med underling verskel maken. In 1989 kümmen se terügge med Steel Wheels, wårvöär se ne groute stadiontour bokeden: de Steel Wheels/Urban Jungle Tour. Seyd de jåren ’90 kummet se minder reygelmåtig med ny wark, mär blyvet se noch altyd ne gewilde band in de podiumwearld. In 2007 had de band veer van de vyv bestverkochte koncertreisen up naam: Voodoo Lounge Tour (1994-1995), Bridges to Babylon Tour (1997-1998), Licks Tour (2002-2003) en A Bigger Bang (2005-2007).

In 2012 vyerden se dat se vyvtig jår bestünden. Öär nyste album, Blue & Lonesome (2016) was öär twaalvde nummer-eyne in et Vereynigd Köäningryk. Noch altyd sint hallen wår as se spöllet glad uutverkocht. Öär lätste No Filter Tour deade weader twey jår, töt in 2019.

De skattede verkoup van 240 miljoon albums maket öär de best-verkoupende musikanten van alle tyden. Se hebbet dree Grammy’s en nen Grammy Leavenswarkprys up name. In 1989 wörden se al upenöämen in de Rock and Roll Hall of Fame and in 2004 in de Music Hall of Fame.

In total hebbet se 30 studioalbums uutebracht, 23 livealbums en verskeidene samenestelde albums. Med Let it Bleed uut 1969 begün öären streak van vyv achtereynvolgende albums up nummer eyne in de hitlysten. Öär album Sticky Fingers (1971) was den eyrsten uut de ryge van acht achtereynvolgende albums dee up eyne in de Vereynigde Ståten kümmen.

In 2008 wörden de Stones teendes up de Billboard Hot 100 All-Time Top Artists. In 2019 köäs et tydskrivt Billboard se as tweydes in öäre lyste van ‘Grötste artisten van alle tyden’, up basis van öär sukses in de VS.