Stadshagen
|
Stadshagen is ok de name van een stadsdiel van Stockholm, de name van een metrostesjon in det stadsdiel, en de Zweedse name van Kaupunginhaka, een stadsdiel van de Finse stad Porvoo. |
Stadshagen (Zwols: Stadsägen) is een wiek van de Aoveriesselse heufdstad Zwolle waor begun 2022 27.020 lu woonden (26.000 an 't begun van 2020). 't Is de neiste wiek van de stad; mit de bouw bint ze in 1995 begund. Stadshagen lig in 't noordwesten van Zwolle en in 't zuudoostelijke diel van de middelieuwse polder Mastenbroek. In tegenstelling töt de mieste woonwieken van Zwolle-Noord lig Stadshagen ten westen van het Zwarte Water.
Stadshagen bestiet uut de buurten Milligen, Schoonhorst, Werkeren, Frankhuis en (in anbouw) De Tippe, Breecamp en Breezicht. Mit de wieken Westenholte en Spoolde vörmt Stadshagen sinds 2012 't Zwolse stadsdiel West.
Geschiedenis
[bewark | bronkode bewarken]Waor now Stadshagen lig, stund tussen 100 en 500 nao Chr. een moerasbos, det daornao verdween in een zuutwatermeer. In de 14de ieuw wördden 't gebied anemeuken en inepolderd. De oorspronkelke opzet van Stadshagen is ontwörpen deur stedenbouwkundige Klaus Folmer; dizzend is wieder uutewarkt deur bureau BGSV uut Rotterdam. 't Geboorteciefer van de wiek was al in de begunjaoren 't hoogste van de gemiente Zwolle. De bedoeling um een gedifferentieerde bevolking te laoten ontstaon is niet elokt; der kwamen veural jonge gezinnen uut aandere dielen van Zwolle wonen.
Veurzienings en verkeer
[bewark | bronkode bewarken]'t Winkelanbod van Stadshagen vien ie haoste allemaole in Winkelcentrum Stadshagen, det der in 2004 kwaamp en ok een Cultuurhuis hef. In 2009 wördden jongerncentrum Level Z dalezet mit veule inbreng van jongelu, die 't centrum ok bestiert mit hulpe van een jongernwarker. In 't noorden van de wiek lig de in de jaoren zestig ontstaone Milligerplasse, die een eigen straandtien hef.
Verkeer tussen Stadshagen en de rest van Zwolle kan gebruukmaken van de Mastenbroekerbrogge (1998) en de Twistvlietbrogge (1999, veur openbaar vervoer en langzaam verkeer) aover 't Zwarte Water en de Voorsterbrogge aover 't Zwolle-Iesselkenaol. Rond Stadshagen löp de neie rondweg de Hasselterweg. In 2019 is Stesjon Zwolle Stadshagen lös edaone, det onderdiel uutmak van de spoorlien Zwolle - Kampen ('t "Kamperlientien").
|
Dit artikel is eschreven in 't Zuudwest-Drèents. |
