Veessen

Veessen

Veessen is n darp in de gemeente Heerde, in de Nederlandse provinsie Gelderland. t Hef zo'n 678 inwoners (siefers uut 2005). t Darp ligt an de westelike oever van de rivier de Iessel. Veessen hef twee basisschoelen, "De Heemde" en "De Zaaier". Verder hef t darp n päär winkels: n kleine bakkerieje en n parketwinkel. In Veessen stiet n karke, eigendom van de PKN-gemeente. Neumensweerdig is t örgel, ebouwd deur Petrus van Oeckelen. As een van de weinige örgels van de hand van disse bouwer is dit örgel nog in oorspronkelike staot. Verder is der de voetbalklub VEVO en n fanfare die "Vivo" heet. Der bint drie kämpings. In t butengebied van Veessen he'j völle melkveebedrieven.

De plaatsnäme kwam in 1217 veur as Vesce, al bestaon der twiefels of daor warkelik t Veessen van noe mee bedoeld wordden. t Is in elk geval wel dudelik dat in 1365 de plaatse as Vesen eschreven wordden. In 1459 dook de spelling Veessen op. Op 1 jannewaori 1812 wordden Veessen as zelfstandige gemeente of-esplitst van Heerde. Op 1 jannewaori 1818 kwam der alweer n einde an de zelfstandigheid en keerden Veessen terugge bie Heerde. Opvallend detail is dat de gemeente Veessen gien gemeentewaopen had. Op n anvraoge van 29 juli 1816 gaf de börgemeister van Veessen zels an dat ze der ok niet veur in anmarking kommen wollen.

An de Iesseldiek stiet de Mölle van Bats, n korenmölle uut 1779.

Foto-uutstalling

• 
  De hervörmde karke te Veessen
• 
  De haven van Veessen
• 
  De Mölle van Bats
• 
  Boerderieje de Holle Wand

Gemeente Heerde
Heufdplaatse Heerde Darpen: Veessen · Vorchten · Waopenvelde Buurtschappen: Bakhuusbos · Barghuzen · Hoorn · Hoornervaene · Horsthoek · Markluden · Waopenvelde-Noord · Warven · Wolbert

Dit artikel is eskreaven in et oustveluwske dialekt van Veessen/Heerde, in de Algemene Nedersaksiese Schriefwieze.