Persepolis

Uut Wikipedia, de vrye encyklopedy
Nå navigaty springen Nå söken springen
Oaverblyvselen van de Poarte van alle landen in Persepolis
As de meyste städen in dee tyd wör Persepolis (deyls) up ne künstmåtig anelegde verhöyging ebouwd

Persepolis (oldpersisk: 𐎱𐎠𐎼𐎿 (Parsa), nypersisk: تخت جمشید, transkribeerd Tacht-e Djamsjīd, de trone van Jamshid) was de ceremoniäle höyvdstad van et Achaemenidenryk (tüsken 550 en 330 v.K.). Et ligt up de vlakte van Marvdasjt, ineslöäten döär de bargen van Zagros in Iran. Et hüdigendaagse Sjiras ligt up ungeväär 60 km up et süüdwesten van de oaverblyvselen van Persepolis. De öldste oaverblyvselen van Persepolis gåt weaderümme töt 515 v.K. Et is en vöärbeald van Achaemenidiske architektuur. UNESCO verklården Persepolis wearldarvgood in 1979.

Et spül steyt houge up en ummüürd platform, med vyv "paleisen" of hallen van verskillende grötte en ryk versyrde poarten. Et is neet düdelik wåras Persepolis vöär deenden. Et was neet eyne van de gröätste städen van Persie of selvs mär van et heyle ryk. Et likt der dat et ne groute steade vöär ceremonys was dee mär en heyl enkelde mål in et jår betrachted wörden. Ouk is noch neet bekend wåras den köäning syne kamers warren.

Töt vöär kort meynden archeologen dat Persepolis vöäral bestemd was üm rund de vöärjårssünnewende et Nowruz, persisk nyjår, in te vyren. Dat is noch altyd nen belangryken feastdag in et hüdige Iran. In de bealdhauwwarken langs de müren van de trappen is te seen dat iraanske ädelen en underköäningen uut andere streaken van et ryk hyr kümmen med geschenken vöär den köäning.[1]

Ouk is noch neet düdelik wat vöär bouwwarken as der buten et paleiswark stünden. Wårskynlik was et ginnen stad up sikselv. In 330 v.K. nöäm Aleksander den Grouten et in med syn laeger. Rap dårnå verwoosten nen brand al et holtwark. De geleyrden meynet dat dat upsettelik was.

De archeologisk vöärnaamste oaverblyvselen van Persepolis sint de Poarte van Alle Landen, et Apadana-paleis, de troonhalle, de Tachara en ne vöärråd münten en kleitabletten.

Name[bewark | bronkode bewarken]

De name Persepolis kümt uut oldgreeksk Περσέπολις, med latynske letters: Persepolis. Et is samenstelling van Pérsēs (Πέρσης) en pólis (πόλις), wat "persiske stad" bedüdt. De olde persen selv nöömden et Pārsa (oldpersisk: 𐎱𐎠𐎼𐎿), wat ouk de name vöär de ümliggende streake was.

In et jår 311 skreav den sasaniaansken prins Sjapur Sakansjah, söäne van Hormizd II oaver de stad as Sad-stūn, wat "hunderd puurs" bedüdt. Middeleywske persen skreaven de steade to an Djamsjid, nen köäning uut de iraanske mytology. See nöömden et Tacht-e-Djamsjid (Persisk: تخت جمشید‎; [ˌtæxtedʒæmˈʃiːd]), letterlik "de trone van Djamsjid". Ne andere name was Čehel Menār, letterlik "Veertig Minaretten".

Ligging[bewark | bronkode bewarken]

Persepolis ligt kort by ne kleine rivyr, de Pulvar, den as uutlöpt in de rivyr de Kur.

De steade is ebouwd up ne verhöyging van sou'n 125.000 meter in et veerkant. Dee verhöyging is deyls kunstmåtig upebouwd en deyls uut nen rots ehöwwen. De oustelike syde löänt up den barg Rahmat. De andere dree syden ligget up draegmüren van verskillende höygdes, afhangelik van de helling wårup as se röstet. Up et westen was ne dübbele trappe van 5 töt 13 meter houge, wårvanaf et händig uplöpt richting den top. Üm et terras lyk te maken, wörden gäter en kulen upevüld med aerde en groute keien, dee med metalene klammen by mekander ehölden wörden.

Geskedenisse[bewark | bronkode bewarken]

Uut upgraevingen blikt dat den bouw begün in 515 v.K. Den fransken undersöker André Godard meynden at Cyrus den Grouten de steade anweas, mär dat Darius I et löät bouwen. Dat lätste steyt ouk in de müren ebeiteld. Persepolis wör wårskynlik de nye höyvdstad, al lag et neet heyl makkelik. De echte höyvdstäden bleaven Babylon, Susa en Ecbatana. De stad was by de greken neet bekend, töt Aleksander den Grouten et innöäm en verwoosteden.

Darius I löät Persepolis tegelyke med syn paleis van Susa bouwen. Dat stünd der groutendeyls ouk model vöär. Hee gavven den updracht vöär ne groute halle en de Rådshalle (Trypilon) en de groute keiserlike skatkamer en allens wat dår ümhen höyrden. Synen söäne Xerxes I makeden et af. Et bouwen güng döär töt et ryk uuteandelik uut mekander völ.

Grysen sandsteyn was et höyvdmateriaal vöär Persepolis. Do as de rotsen lyk warren ehakked en de kulen evüld, deaden de bouwers et grundterras lykmaken. groute rioleringstünnels höwwen see döär de rotsen. An den ousteliken voot van den barg höwwen see nen grouten waterupslag. Tegelyke dårmed wörden ouk de torens upetrökken. Et terras was verdeyld in ungelyke höygdes med hellende müren, wårdöär et as nen ård kasteel warkeden. Verdeadigers kunden et vanaf ne höygere steade uut alle höke verdeadigen. Diodorus Siculus skrivt dat Persepolis dree verdeadigingsmüren med skuultorens had. De eyrste müre was 7 meter houge, de tweyde 14 en den darden, den as alle veer syden rakeden, 27 meter houge. Van de müre is vandage den dag niks meyr te vinden.

Verwoosting[bewark | bronkode bewarken]

Nådat hee in 330 v.K. achaemenidisk persie was binnenevöllen, tröäk Aleksander den Grouten med syn laeger voordan når Persepolis. Dat kunde mooi rap oaver den Köäningliken Snelweg van Darius. Diodorus Siculus beskrivt dat see underweg unthaald wörden döär sou'n 800 greekske ambachtslüde, dee in Persie evöngen warren. De meysten warren al ölder en warren verminked. Se misden byvöärbeald nen arm of nen voot. See verklården dat de persen öäre künde gebruken wolden en probeerden te vöärkummen dat se up de löype solden gån. Dat vünden Aleksander en syn gevolg en verskrikkelik verhaal. Diodorus skrivt neet dat dit de readen was vöär de verwoosting van Persepolis, mär et kan good weasen dat Aleksander hyrdöär slecht oaver de stad begünde te denken.

Do as et laeger den döärgang döär de Zagrosbargen bereikeden, bestormden see de Persiske Poarte. Den persisken laegerleider Ariobarzanes lokkeden öär in ne hinderlåge. Vöäle macedoniske soldåten kümmen uut de tyd. Toch lükkeden et Aleksander nå 30 dage üm de belagers te ümseilen. Wat brunnen bewäret dat nen gevangen stamleider öär ne sluuprute löät seen. Ariobarzanes wör ümmebracht en de verdeadigers vernetigd.

De stad güng neet lange dårnå in vlammen up. Et is neet düdelik of Aleksander der wat med te maken hevt, mär brunnen willet dat et ne vergelding was vöär de verbranding van Atene sou'n hunderd jår dårvöär. Et kan ouk symbolisk bedoold eweasd weasen, üm de persen te låten weaten dat öäre köäningen verslån warren.

Teagenstrydig genog sorgden den brand dervöär dat vöäle kleitabletten med beskryvingen oaver Darius I en et persiske ryk bewård bleaven under de höype püün.

  1. Mousavi, Ali, Persepolis: Discovery and Afterlife of a World Wonder, p. 53, 2012, Walter de Gruyter, ISBN 978-1614510338, Google Books