UNESCO

Uut Wikipedia, de vrye encyklopedy
Nå navigaty springen Nå söken springen
Vlagge van UNESCO

UNESCO is ne towyde organisaty van de Vereynigde Natys wat sik gangs höldt med wearldvreyde, bestryding van årmood, duursame untwikkeling en bemiddeling tüsken kulturen. Dat doot se döär sik te richten up skolen, weatenskap, kultuur en kommunikaty. De UNESCO is egrunded up den 16. november 1945 med et höyvdkantoor in Parys. Lid van de organisaty sint 193 ståten.

De name UNESCO is ne afkörting vöär et engelske United Nations Educational, Scientific and Cultural Organization, de Edukative, Weatenskappelike en Kulturele Organisaty van de Vereynigde Natys.

De UNESCO hevt vyv richtpunten: underwys, natuurweatenskappen, sociale weatenskappen, kultuurstudys en kommunikaty. Dårbinnen understüttet se projekten dee lüde leasen en skryven leyret, bedet techniske upleidingen, stimuleert weatenskappelik undersöök, beskarmet unafhangelike media en persvryheid, besküttet regionale en kulturele geskedenisse en promotet kulturele verskeidenheid.

Binnen wearldkultuur en weatenskap hevt UNESCO de lätste jåren et warkveld wat uutebreided når umsetwark van wearldliteratuur. Ouk settet se internationale samenwarkingsprojekten up üm Wereld-Arvgood te beskarmen, up te kummen vöär menskenrechten, brengt de digitale wearld körter by mekander, en stichtet oapen kennisgemeynskappen vöär informaty en kommunikaty. Eyne van de projekten wat UNESCO egrunded hevt is Education For All (Underwys Vöär Ydereyne).

UNESCO steyt under regeyring van de Generale Kunferency, wat besteyt uut lidståten en deylneamende leaden. Dee kummet alle twey jåren by eynander üm et programma en budget vaste te leggen. Ouk keset se dan leaden vöär den Uutvorenden Råd dee as UNESCO's wark leidet, en wyset nen Direktöör-Generaal an den as UNESCO's höyvdvöärsitter is. UNESCO is lid van de Untwikkelingsgrup van de Vereynigde Natys, en samenwarkingsverbund van VN-agentskappen en bedryve dee as de Duursame Untwikkelingsdolen wilt halen.