Natuurbeskarming

Uut Wikipedia, de vrye encyklopedy
Nå navigaty springen Nå söken springen
Heide en bos up de Sallandske hövelrügge körtby Nijverdal

Natüürbeskarming is et beskarmen van natüür, vöäral in breyde sinne et beskarmen van natüürlandskappen, kültüürhistoriske elementen, bedreigde leavensgemeynskappen, deer- en plantensoorten, de verskeydenheid an soorten (ouk wal 'biodiversiteit' enöömd) en natüürlike hülpbrunnen. Ouk et teagengån van bedreigingen en weaderümme brengen van 'n oldere (oorspronkelyke) ståt höyrt derby. Natüürbeskarming besteyt al 'ne lange tyd. De moderne westerske vorm besteyt nu ungeväär 150 jår. De natüürbeskarming is altyd nau verweaven eweasd med miliööbeskarming. Dårumme wordet mangs miliöö- en derenbeskarmingsorganisasys ouk as nen form van natüürbeskarming eseene. Dee grense tüsken natüür- en miliööbeskarming is neet altyd eaven skarp.

Situaty rund 1850[bewark | bronkode bewarken]

Vöäle natüürbeskarmers lyket weaderümme te willen når de olde kültüürlandskappen van 150 töt 170 jår eleaden (üm 1850), når de tyd vöär de indüstrialisaty en künstmest, toon as de menske noch med de natüür leaven must en de natüür noch neet good under den düüm te krygen was. In dee tyd wassen der noch vöäle natüürsteades wåras buren niks med kunden, so as te natte steades langs beaken, moorassen, veanen, mär ouk te dröyge steades dee as neet ryke genog warren vöär landbouw. Dee steades wörden 'wooste grund' enöömd. Dår wassen de natüütsteades med bysündere soorten dee as natüürbeskarmers nu gaerne weaderümme wilt. Mär ouk den oavergang van kültüür når natüürlandskap makeden dat der meyr verskillende soorten kömmen. Vöäle soorten gedyt by de öävergang van ryken når armen grund. De olde manere üm et wild van de wooste grund teagen te holden (holtwallen, holtsingels, heggen, esw.) sorgeden der korrekt vöär dat vöäle soorten der dankenswaerdig gebrüük van maket. De buren hadden dee natüür dichtby ouk nöydig vöär et burenbedryv. So deaden de buren up de sandgrunden de heide plaggen ümme te gebrüken in den potstal. Dårnå deaden se der de akkers med bemesten. Et holt in de holtwal gebrükeden se vöär et maken van klumpen, stealens van gereydskap. Et turf üüt et vean (skadden) wör gebrüked vöär et vüür in de buurderye. Döär de natüür te gebrüken, hölden se vroger ouk een deyl van de natüür in stand. In de situaty vöär 1850 was der neet vöäle veranderd an et gebrüük van et landskap. Natüür stund wal under druk, mär natüürsystemen wassen noch neet so vöäle anetasted as nu. Der was wal een verskil tüsken de situaty üp de sandgrunden, et rivyrengebeed en de veanen. De veanen kent al lange 'n ontginning üm türf te winnen. Vöäral de laegveansteades vanaf ungeväär 1500, wårdöär vöäle veanen verdweynen in et vüür. Ouk et rivyrengebeed kent al sinds 1200 indyking, wårdöär de rivyren neet meyr so vry wassen en et rivyrenstelsel ünder druk kwam te stån. De sandgrunden saggen der heyl anders üüt as nu; der was vöäle meyr van. Ouk wassen der gröttere veanen en heidesteades. Y künden van et eyne når et andere dorp kyken as y wulden. Walden wassen vake ekapped. Et lätste oorwald van Neaderland, et Beakbergerwald, wör in 1871 ekapped.

Situaty nå 1850[bewark | bronkode bewarken]

Vanaf 1850 wörren vöäle deylen natüür sneller untgunnen as de bevolking groide. Dorpen en steaden groiden, wårvöär natüür in de weg stund. Ouk kömmen der üütvindingen üm de natüür better te künnen untginnen of üm armen grund te verryken (byvöärbeald künstmest). De olde maneren üm akkers te beskarmen teagen wild van de wooste grund wörden wegekapped en vervangen döär prikkeldråd. Beaken wörden rechtetrokken üm bepålde natte steades te künnen gebrüken. Dee olde mengeling van et kültüürlandskap en natüür verdweyn. Döär de Romantik wassen der steyds meyr lüde dee et belangryk vünden dat de natüür wör beskarmd. In et begin vöäral üm de verskeydenheid an soorten en natüürlandskappen te beholden, later ouk üm bedreigde soorten en slim betöön wördende natuursteades.

Et idee van natüürbeskarming in moderne sinne is in de Vereynigde Ståten üütevünden. Nådat George Perkins in 1864 syn book Man and Nature uutbrachteden wörden der plannen emaked üm natüürsteades tot nationaal park te verklåren. In 1870 richteden de amerikaanske öäverheid een ny büreau up en in 1872 wör et eyrste nationale park Yellowstone National Park estichted. Europa had in 1836 al 'n beskarmde natüürsteade, Drachenfels in Düütskland. In Düütskland wör in 1870 et woord Natürschutz et eyrst gebrüked döär musikus Rudorff, dee leider wör van de Heimatschütz-beweaging. Plantenkenner Conwentz en üpvodingskenner-politikus Wetekamp hebbet disse ideen wyder üütewarked in pleidooien vöär Natürdekmäler üm 1900. De eyrste europeeske nationale parken wörden estichted in Sweyden üm den eeuwwisseling.

Natüürbeskarming in Neaderland[bewark | bronkode bewarken]

In Neaderland wör et eyrste natuurreservaat uperichted in 1906. Et Naardermear wör nå 'n akty van under meyr Heimans en Thijsse anekochted. Tegelyke richteden se de Vereniging Natuurmonumenten up. De vereyniging was de eyrste landbehearende natüürbeskarmingsorganisaty in Neaderland. Heimans en Thijsse sagen dat vöäle meyr städen en dorpen üütbreiden en dat landbouw med moderne techniken meyr natüür kunde untginnen, wårdöär natüürsteaden anetasted wörden of verdweynen. Ümme disse ontwikkeling teagen te gån, wassen se vöäral natüürsteaden an et upkopen en beskarmen. Vereniging Natüürmonumenten richteden in Neaderland ümme 1930 ouk regionaal warkende organisasies up, sou as de Provinciale Landskappen.

Nå disse vanüüt et volk estüürde ankoop van natüürsteades en internationale andacht vöär natüürbeskarming, wolde ouk de regeyring natüürsteades better beskarmen döär se as natüür te verankeren. In 1990 wör dårümme de Ekologiske Höyvdstruktuur (EHS) bedachted. Disse term wör vöär et eyrst enöömd in et Natüürbeleidsplan (NBP) van et Ministerie van Landbouw, Natüür en Voodselkwaliteit. De EHS had as dool ümme belangryke natüürsteades med mekaar te verbinden, sodat soorten van de eyne syde van Neaderland når de andere syde kunden kommen. In 1995 wörden der doolsoorten en natüürdooltypen an ekoppeld. Disse musten ontwikkeld worden döär üütvoring van de EHS. Et dool was üm in totaal 728.500 hektare med mekaar te verbinden en in te richten. 'n deyl was al natüür, byvöärbeald wald, moorassen of veanen, mär et untbreakende deyl must nog wörden inevüld. Ouk musten belangryke upstoppingen in de verbinding upelöst worden med ekodukten en beystentünnels. Üm et jår 2011 was 55% van de EHS anekochted en 30% ingerichted. Et Kabinet-Rutte I versoberden de EHS. Et Kabinet-Rutte II draiden dat weader wat terügge. In juni 2013 wör de Ekologiske Höyvdstruktuur neet meyr enöömd, mär güng up in de term Natüürnetwerk Neaderland (NNN). Leasers van de krante Trouw hadden disse name bedachted. Et dool van 728.500 hektare wör når beneaden byesteld tot 600.000 hektare. In 2014 wör de verantwoordelikheid vöär de üütvoring van et beleid öäveredragen an de provincys. De EHS was vrogger et vöärbeyld vöär et Europese Natura 2000-netwark, Europa was ünder de indruk van de groute plannen van et natüürnetwark. Nu löpt Neaderland weader achteran, döärdat döär politieke beslissingen et ekologiske netwark nog neet untwikkeld is sou as dat in 1990 was bedachted.

Natuurbeskarmingswetten[bewark | bronkode bewarken]

In 1912 güng de Vöägelwet in. Neaderland löyp in dee tyd vöär op de rest van Europa. De Vöägelwet had 'n antal regels öäver et vangen, douden en medneamen van vöägels, öäver vangmiddelen, et vangen van vöägels vöär de kauwe en vöär de jacht, et pakken van eier en vernelen en verstoren van nösten. Enkele soorten dee as skadelik wörden eseen formden 'n üütsundering up disse wet. In 1936 wör de olde wet vervangen döär 'n nye Vöägelwet.

Nå de Tweyde Wearldorlog begünnen meyr en meyr mensken positiv te denken oaver Natüürwetgeving. Lüde begünnen in te seen dat völle soorten bedreigd wörden, op uutstarven stünden of al uutestörven wassen. In 1954 wörden dårümme verskillende soorten meyr beskarmd in de nye Jachtwet. Ouk güng in 1967 de eyrste Natüürbeskarmingswet in warking, med in 1973 et ‘Beslüüt beskarmde inheymske deersoorten’ en et ‘Beslüüt beskarmde inheymske plantensoorten’. Soorten dee al ünder de Vöägelwet of Jachtwet völlen, wörden neet in de Natüürbeskarmingswet upenömmen.

De oldste richtlijn dee nog wörd ebrüükt is de Vögelrichtlijn üüt 1979. Disse richtlijn regelt de beskarming van alle in et wild leavende vögelsoorten in Europa. Vöär 'n lyst van 187 seldsame of bedreigde soorten mos leevsteaden, öäverwinterings- en treksteaden as Spesiale Beskarmingszone (Vögelrichtlijnsteade) anedüüd wörden.

In Europa wördt in 1992 wyder ünder Neaderlands vöärsitterskap de EG-Habitatrichtlijn anenömmen döär de landen van de Europese Gemeynskap. Disse richtlyne is bedoold vöär de beskarming van soorten en natüürsteades, ouk hyr Speciale Beskarmingszones enöömd. Samen med de steades van de Vöägelrichtlyne formden dee et netwark Natura 2000. Wyder beskarmden de Habitatrichtlyne ongeväär 200 deersoorten en ongeväär 500 plantensoorten.

Wyders wör in 1961 ouk 'n Waldwet inesteld ümme te sorgen dat de umvang van et wald neet wyder afnöäm. Döär de Waldwet must vöäral et uppervlak wald beholden wörden. Later hebbet se de regels meyr anevüld med regels öäver et behold van de kwaliteit van et wald.

In 1998 wör de Neaderlandse wet- en regelgeving veranderd, ümme de Europeeske regelgeaving better in de Neaderlandse wet üp te neamen. De Natüürbeskarmingswet 1998 regelden vanaf toon de beskarming van natüürsteades en water. Neaderland hef 162 natüürsteades aneweasen dee in anmarking kummet vöär beskarming ünder de Habitatrichtlyne of de Vöägelrichtlyne of beide. De deylen üüt de Natüürbeskarmingswet dee gåt üm de beskarming van soorten wörden ünderebrachted in de Flora- en faunawet. Disse wet güng in 2002 in en regelden de soortenbeskarming in Neaderland. Dårmed was de Europese regelgeving kompleet upenömmen in Neaderlandse wetgeving.

Wetgeving nu[bewark | bronkode bewarken]

Vanaf 1 januari 2017 is de nye Wet natuurbeskarming (Wnb) in warking. Disse wet hef de vroggere Natuurbeskarmingswet 1998, Flora- en faunawet en Waldwet upenömmen. Et dool van de nye Wet natüürbeskarming is ümme de wetgeaving makkelijker te maken. Ouk hef de wet as dool um de verbinding tüsken ekologie en ekonomie meyr möägelikheiden te beden. Döär de wet bint vöäle taken en verantwoordelikheiden når de provincys ekummen. Döär kün y 'n vergünning of untheffing vrågen as y an 'n projekt warket wår beskarmde soorten anetasted wordet of as y warket in 'n beskarmde natuursteade.

Nuvola apps ksig.png Dit artikel is eskreaven in et sallandsk.