Marksk-brandenbörgsk

Sassiske en frankiske dialekten (nr. 9)

Et marksk-brandenbörgsk is en dialektgrup van et oustneadersassisk, dat underdeyl formt van de neadersassiske språke. Vanolds wördden dit dialekt noch in deylen van Vöärpommeren, in et noorden van Sassen-Anholt en in Brandenbörg espröäken, byvöärbeald in de Oldmark, in de Uckermark en in Prignitz.

De woordvöärråd van de markske dialekten steyt vermelded in et Brandenburg-Berlinisches Wörterbuch, in et Pommersches Wörterbuch en in et Mittelelbisches Wörterbuch.

Gebeed

De noordgrens van et dialektgebeed löpt so'n beetjen vanaf de poolske grens langes de deylståt Meakelenbörg-Vöärpommeren tot an de rivyr de Elve. An de westkante van de Elve höyrt de Oldmark noch by et marksk-brandenbörgsk. Vearder in et süden van Sassen-Anholt höyrt de oustelike over van de Elve vöär et groutste deyl by et marksk-brandenbörgsk. De süüdgrens is geliek an de süüdgrens van et neadersassisk. En precise grens is neet sou makkelik vaste te stellen, döärdat et neadersassisk al eywig lange teruggedrüngen wördt döär et hougdüütsk. Vandage de dag wördt et marksk-brandenbörgsk döär mär min meansken espröäken; in et noorden wel wat meyr, mär in et süden al souwat döär geyneyne meyr. De oustgrens is de landsgrens mid Polen. Vöärdat de düütskers in 1945 üüt de poolsk besettede gebeden verdreaven waren, wördden der an de oustkante van de Oder, in de Nymark ouk noch marksk-brandenbörgsk espröäken.

Bysünderheiden

De dialektgrup kan upedeyld wörden in et noordmarksk, en in et min of meyr verdweynen midden- en süüdmarksk. Et marksk-brandenbögsk hevt en deyls neaderlandsk-neaderfrankisk karakter, wat en gevolg is van et andeyl neaderfrankiske kolonisten in de brandenbörgske kolonisaty van de 12.-13. eyw. Dårin verskilt et under andere van et meakelenbörgsk-vöärpommersk in et angrensende noorden. In et gebeed rund Berlyn binnen de midden- en süüdmarkske dialekten al sou vermengd mid andere middeloustdüütske dialekten, en hougdüütsk dialekt, dat et geen neadersasssisk meyr enöömd kan wörden. In dit gebeed spreaken se sinds 21. eyw van et lausitzsk-nymarksk, dat untstån is üüt et lausitzsk en et süüdmarksk. Et marksk-brandenbörgsk wördden vrogger espröäken tot in de umgeaving van Havelland en Oderbruch. Döär et versküven van de Benrather Liny in noordelike richtinge is et marksk-brandenbörgsk dår groutendeyls verdrüngen döär et lausitzsk-nymarksk.

Dit artikel is eskreaven in et westveluwsk, in de Nysassiske Skryvwyse.