Marga Bult
Marga Bult, geboorn as Marga Groeneveld (Lattrop, n 2den juli 1956) is ne tweantse zangeresse en presentatrise. Rechtevoort wont he in Deanekaamp.
Loopbaan
[bewark | bronkode bewarken]Van kleins of an dut Bult al optreadn in de umgewing van Lattrop. Öar eerste plaat Twee witte duiven keump oet in 1970 at he 14 joar is. Doarnoa dut he nog twee plaatn opnemn, woervan't dr ene in t Duuts is. Hee dut met an Stuif es in van de AVRO en geet wieter met optreadn duur Neerlaand. Nöast t zingen dut he ook nog studeern en krig zin verpleegstersdiploma met lof. Nöast t woark as zangeresse met verskeaidene orkeste in Neerlaand en Duutslaand blif he woarken as verpleegster. Saamn met zangeresse Marianne Wolsink (van t vrogere Teach-In) hef he vanof 1979 t duo Tulip.
In 1981 keus Peter Koelewijn Bult oet 250 anmealdings as nieje zangeresse van de meaknsgroep Babe umdet Gemma van Eck dr met oetskeaidn. Vanof dee tied wör he bekeand as Marga Bult. Babe har 16 hits en gungn de hele wearld oawer, vuural noar Indonesië. Maleisië, Libanon, en Europa. 1986 stopn Babe.
1987 deed he vuur Neerlaand met an t Eurovisiesongfestival in Brussel, woerbie't he öarn naam leut skriewn as Marcha um t vuur de boetlaandse jury's makkeliker oet te sprekn te maakn. hee wör viefdes met 83 peuntn, en kreeg van de internasjonale pers de "populariteatspries".
Noa t songfestival begun Bult met presenteern. Hee wör panellid van t VARA-programma "Zeg 't maar" en gung in 1990 t radioprogramma "n Bult Zon" maakn vuur RTV Oost. 1992 wör he vast panellid bie "Zo Vader, Zo Zoon" van de NCRV. Later deed he nogg "Altijd maar draaien" van TV Oost , "Let's make music" (TROS) en "De Droogkap" (Veronica en (Call TV)) presenteern.
Mei 2000 vörmen he met Sandra Reemer en Maggie MacNeal (echte name Sjoukje Smit) t trio Dutch-Diva's. Doarnöast deed he det joar bie Veronica n programma presenteern met t medium Jomanda.
De Diva's hadn ne mega top 100 hit met t nommer from NY to LA. Wieter wördn ze oet erop as "beste comebackgroep"van t joar 2001 en kreegn ze in 2003 ne "gouden driehoek" vuur öare positieve biedreage binn de homogemeenskop.
Vanof 2004 gung Bult mear bie RTV Oost woarkn, bievuurbeeld met t rechtstreekste diskussieprogramma "Forum", wat alle wekn oet ezeundn wörd.
In 2005 stopt Sandra Reemer met de Dutch-Diva's, woernoa't Bult beslöt um theater te goan don met t musicalstukke "Diva's in nood" met Sjoukje Smit. Reemer wörd vervöngn duur Justine Pelmelay in de Dutch-Diva's, mer as den noa kortn tied alwier stopt um mear tied met öar gezin te hebn, besloett Bult en Smit um as duo verdan te goan.
2006 wörd Bult ekeuzn as "Diva van t joar 2006" duur t blad Squeeze. Detzelfde joar krig he bie Radio Oost ook nog ne showbizzrubriek. Noadet he in öar loopbaan al duetn har ezungn met o.m. Peter Koeleweijn en Dennie Christian, neamp he ook nog ne duetplaat op met Wim Rijken. Doarnöast hef he n antal gastroln te akteern in Van jonge leu en oale groond.
Januwoari 2007 krig he bie RTV Oost alle wekn n nöalstuk (Achter de IJssel), woer't he öare meaning en inzichten kwiet kan oawer verskeaidene zaakn woer't he drok met is. In april van detzelfde joar doot de Dutch-Diva's ne nieje cd-single genaamd "Music" oetbrengn met zanger Ben Cramer, woerbie't ze n naam "Divas vs. Cramer" gebroekt. Doarnöast goat ze de theaters in met ne musical vuur stiching "De Zonnebloem".
Nöast öar presentasie-, zaank- en akteerwoark hef Bult nog n eegn bedrief wat dekorstukke verhuurn dut en is he al joarn ambassadrise vuur de stichting "Kans voor een kind". Seend kort is he ook ambassadrise vuur de stichting "Trainers voor Nakuru" oet Kenia.
RTV Oost maakn van Bult zin leawn ne 8-delige realitysoap oonder n naam "Een Bult te doen".