Leuvenhorst

Uut Wikipedia, de vrye encyklopedy

Leuvenhorst is n groot bos-, stuufzaand- en heedgebied tussen Harderwiek en Nunspeet en in t zujen de buurtschap Leuvenum. Leuvenhorst is 1430 bunder groot en wörden beheerd deur Natuurmonumenten.

t Stuufzaandgebied is an t einde van de leste iestied aofezet, zo’n tienduzend jaor elejen. To de eerste meensen der kwammen woenen, was t woud te dronge. Deur veuls te veule bomen te kappen en t heujen van schapen kwam al gauw t dekzaand los. In de 16e eeuw was t gebied een grote onbeheersbaore zaandverstuving ewörden. Vanaof de 19e eeuw bin ze de greui van de zaandverstuving gaon beteunen, deur der n hele kwak bomen an te plaanten. Hierdeur is zowat al t aktieve stuufzaand verdwenen. Um dit unieke ekosysteem toch overlevingskansen te biejen, hef Natuurmonumenten in de jaoren 1991 tot 1996 wele bomen ekapt um zo de wiend weer vat te laoten kriegen op t zaand.

Natuurmonumenten höldt in t noordoosten van Leuvenhorst delen van t Hulshorsterzaand los, zodat t zaand nog kan verstuven. Leuvenhorst is een van de weinige aktieve stuufzaandgebiejen in Nederlaand en is belangriek veur onder aandere graafwepsen en graafbiejen. Rond de zaandverstuving he'j zeldzame en kwetsbaore korstmossteppen, mossen en paddestoelen.

Leuvenhorst besteet naost grote delen stuufzaand en heed oek veur n groot deel uut groffe dennen. Vrogger bin de dennen daor eplaant um overlast van t stuufzaand te veurkoemen. t Is n extreem leefgebied. De temperatuur en de vochtigheid in t zaand kan aordig oplopen, mer kan oek zo weer dalen. De dieren die der leven bin onder aandere wild zwien, harten en reeën, boommarters de zaandeverdässe,heedvlinder, mierenleeuw, nachtzwaoluwen en de duunpieper.

Dit artikel is eskreaven in et westveluwske dialekt van Nunspeet, in de Algemene Nedersaksiese Schriefwieze.