Kotten

Kotten is ne buurtschop in de gemeente Wenterswiek, in den Achterhook, in de Nederlandse previnsie Gelderlaand. Kotten hef ne oppervlaakte van ruum 13 km² en doar bunt rundumme 800 inwonners. Et wöd deur heur greutte mangsmoal darp eneumd, moar de plaatse völt formeel under et darp Wenterswiek. Moar et postadres wöd eschraeven as Winterswijk-Kotten.

Kotten is oostelek elaegen van Wenterswiek. Tussen Kotten en Wenterswiek ligt nog de noaberschop Brinkheurne. Kotten ligt teggen de grenze met Duutslaand, dreks oaver de grenze ligt et Duutse darp Oeding. Met dit darp was doar in de löppe van de geskiednis völle verkeer, zowal gewonen handel as smokkel en vermenging. Völle familienamen bunt doarumme te vinden an beide zieden van de grenze.