Aerdöäly

Uut Wikipedia, de vrye encyklopedy
(döärstüürd vanaf "Eerdeulje")
Jåknikkerd, stellage üm öäly uut den grund to pumpen

Aerdöäly, ruwen öäly, mangs ouk peteröäly nöömd (neadersassisken verbastering van petroleum), is nen fossilen brandstof, nöäst aerdgas. Et untsteyt as koalwaterstoffen sik vermengen doot töt nen vlööistof wat good branden wil. Et wördt eförmd döärdat resten van planten un deers (vöäral plankton) miljonen jåren weaderümme in de domålige seyen in den boadem torechte köämen sint un dår luchtlous afeslöäten eleygen hebbet. Dårdöär kunden de resten neet volleydig verteyrd worden, mär bleav der nen dikken blubber oaver. Togelyke untsteyt sou ouk aerdgas. Steynkoalen untståt in moorassen.

Oaver öäly is vöäle to doon in de wearld, ümdat der heyle ekonomyen up draiet. Et deent as brandstof vöär vervoor un a'j et verfynet kün y der künststoffen as plastik van maken, wat in alle möägelike förme un produkte göäten worden kan. Öäly gevt et neet oaveral up de wearld, wårdöär groute machten gaerne vechtet üm de vindsteades of lüde dee der woanet beinvlodet üm med öär samen to warken.

Aerdöäly besteyt uut de volgende indeylingen van koalwaterstoffen: alkanen, cycloalkanen, aromaten un bitumen. Dår kan de petrochemiske industry under meyr bensine, smeyröäly, diesel un stoaköäly van maken. In fynchemy künnet se uut aerdöäly selvs stoffen halen üm medicynen to maken.

Vöäral vanaf de jåren 1950 töt 1960 begün de wearld rap meyr öäly to gebruken. Nå den Tweyden Wearldoorlog draiden de wearldekonomy der good up, want de wearld must weader upebouwd worden. Med öäly warren ouk produkten goodköyper to maken, wårdöär voordan meyr lüde en makkeliker leaven kreagen.

De lätste jåren sint lüde gån inseen dat et massale gebruken un upstoaken van öäly ouk slechte uutwarking up de planeet hevt. Ouk beseffet de lüde sik voordan meyr dat et en mål up is.

Geskedenisse van aerdöälywinning[bewark | bronkode bewarken]

In et Middenousten deaden se al med öäly in de oldheid. Dår bübbelden et ja sou uut de grund ümhouge. Med den teyr deaden se skeype un hüse waterdichte stryken. Ouk öälylampen stöäken se der med an. In 340 deaden se in China al öälyputten boaren töt 240 meter depe. Un Marco Polo saggen in 1264 wo as se in et azerbaidsjaanske Baku al med öäly gangs warren.

In Europa was wårskynlik den pool Ignacy Łukasiewicz den eyrsten wat ne vergünning kreag üm in 1854 ne öälymyne lös to doon in Bóbrka in de Subkarpaten. Eyrst deaden se de öäly upvangen wat uut de grund an et aerduppervlak küm, later deaden se et gat uutboaren üm et ströymen to versnellen.

In Kanada deaden se as eyrste up de moderne wyse öälyboaren, in 1858 in Oil Springs in Ontario. En jår later begünde de VS ouk by Cleveland (Ohio) to boaren, wåras in 1870 et bedryv Standard Oil egrunded wör. In 1867 begünden de Britten öäly to versamelen up Trinidad.

Nå 1900 begünden meyr un meyr lüde döär to krygen at der in et Middenousten vöäle to halen völ. Iran had machtige öälybrunnen, un in 1908 wör de Anglo-British Petroleum Company dår esticht. In 1928 untdekkeden se in Saudi-Arabie up wat vöär nen machtigen vöärråd of se satten. In 1848 untdekkeden se et Ghawarveld, et grötste öälyveld van de wearld. Vanaf 1951 güngen se dår gangs med öälywinning.

Sou'n 40% van alle energy wat de menske verbrukt, kümt momenteel van aerdöäly. Sou'n 25% van aerdgas un steynkoalen.

Aerdöäly in Neaderland[bewark | bronkode bewarken]

Ruwen öälywinning tüsken 1945 un 2022

In 1943 wör by Skoonebeek in Drente en aerdöälyveld evünden. Töt 1996 wör dår aerdöäly wünnen med jåknikkerds, sou nöömde pumpen dee med en ård kontragewicht öäly uppumpet in ne beweaging dee wat an nen jå-nikkenden kop düt denken. In 2011 wör de winning weader in gang sat, mär nu med nye hougrendementspumpen. Se doot neet blouts uppumpen, mär ouk upsyd. In 1953 untdekkeden se ouk öäly in Westnederland. Seyd 1982 wördt der öäly ewünnen uut den boadem van den Noordsey. Dat leavert nu de meyste neaderlandske öäly.

Wearldvöärråd[bewark | bronkode bewarken]

De skatting van wovöäle aerdöäly der up de wearld to winnen is ligt up 1200 miljard vate. Saudi-Arabie sit noch altyd up den gröätsten vöärråd, dårnå kummet Venesuela un Kanada. Dårnå volget veer landen in et Middenousten: Iran, Irak, Kuweit un de Vereynigde Arabiske Emiraten. Andere landen med anseenlike vöärråden sint Rusland, Libie un Nigeria.

Beweysen vöärråd et land[1]|-
  land 2009/'10/'11/'12
  miljarden vaten
1 Saudi-Arabie 263
2 Venesuela 211
4 Kanada 175
3 Iran 200
5 Irak 115
6 Kuweit 104
7 Vereynigde Arabiske Emiraten 98
8 Rusland 60
9 Libie 46
10 Nigeria 37
11 Kazakstan 30
12 Qatar 25
13 Vereynigde Ståten 21
14 China 15
15 Brasilie 13
16 Algerye 12
17 Meksiko 10
18 Angola 10
19 Azerbeidzjan 7
20 Ekwador 7
79 andere landen samen circa 85

Wearldverbruuk[bewark | bronkode bewarken]

De wearld had in 2012 ungeväär 88,8 miljoon vaten öäly den dag nöydig. De VS brukeden dår 26% van, Westeuropa ruum 15%. Ouk China trekket der inmiddels 11% van up sik an. In 2018 was et wearldverbruuk esteygen töt 97 miljoon vaten den dag. Et IEA meynet dat de vråge når öäly noch wal eaven voordan groit, ümdat de wearldbevolking noch altyd toneamt un de lüde ouk meyr to besteyden hebbet. Dårnöäst lükket et noch neet best üm lüde meyr up duursame energy oaver te setten.

  1. Beweysen vöärråd ruwen öäly, CIA World Factbook. Bekeaken up den 18. febr. 2013.