Driemaandelijkse Bladen

Uut Wikipedia, de vrye encyklopedy
Nå navigaty springen Nå söken springen
Driemaandelijks(ch)e Bladen, eerste riege

De Driemaandelijkse Bladen, veureerst espeld as de Driemaandelijksche Bladen, was een in 1901 opezet, akkedemisch orienteerd tiedschrift mit artikels over de Nedersaksische tael en de kultuur van Oost-Nederlaand. Et was een uutgaeve van de Vereeniging tot onderzoek van Taal en Volksleven in het Oosten van Nederland.

Redaktie[bewark | bronkode bewarken]

Et tiedschrift stund anvankelk onder redaktie van taelkundige Johan Hendrik Gallée en schriever Gerrit Jan Klokman, beidend uut de Achterhoek, bi'jestaone deur mitwarkers uut aandere Oost-Nederlaandse regio's. Vanof 1909 deu de Grunnings-Drèentse onderwiezer Jan Bergsma de redaktie.

Inhold[bewark | bronkode bewarken]

In de Driemaandelijkse Bladen wodden bericht over volksgebruken, volksgeleuf, naemkunde en volkstael (de dialekten van et Nedersaksisch, in plaetse van de van bovenof introduceerde Nederlaandse ienheidstael). Der wodden woordverzaemelingen prissenteerd van specifieke plaetsen of gebieden, zoas Gallée zien woordverzaemeling van de Gelders-Overiesselse dialekten.[1] Ok kooj der Nedersaksischtaelige verhaelen in vienden, zoas van de Zwollenaar Willem Kloeke.[2] Wieder had de studie van de Nedersaksische literetuur een stee, en bi'jdraeges die ingongen op de saemenhang van et Nedersaksisch en et Platduuts.

Laetere geschiedenis[bewark | bronkode bewarken]

In et krisisjaor 1931 hulden de Driemaandelijkse Bladen op te verschienen, mar in 1949 wodden een ni'je riege opezet. Hierveur wodden een verieniging opericht deur de Twèentse taelkundige Herman Bezoen en de Drèentse taelkundige Jan Naarding. Zi'j neugden in 1953 de eerste perfester Nedersaksisch, Klaas Hanzen Heeroma, om in de redaktie te koemen. Laeter dat jaor kwaamp Bezoen om et leven bi'j een verkeersongelok. In 1955 wodden et tiedschrift et orgaen van et deur Heeroma geleide Nedersaksisch Instituut van de Rieksuniversiteit Grunningen.

In 2005 was er vanni'js ofeleupen mit de Driemaandelijkse Bladen, die al een poze niet meer letterlijk alle drei maonden verschenen.[3][4][5]

Vanof 2020 verschient et Jaorboek Nedersaksisch, uutegeven deur Stichting Sasland en boekenbestellen.nl, dat veurzien wil in de liemte die as ontstaon was naodat de Driemaandelijkse Bladen dermit uutscheidden.[6]

Rifferenties[bewark | bronkode bewarken]

  1. Biografisch Woordenboek Gelderland: Johan Hendrik Gallée
  2. Wie is wie in Overijssel: Willem Kloeke
  3. Scholtmeijer, Harrie (2006), Mörn! Taalgids Overijssel, Assen: In Boekvorm Uitgevers bv
  4. Geheugen van Drenthe over de Driemaandelijkse Bladen
  5. Ludger Kremer (2008), 'Geschiedenis van de Nedersaksische taalkunde'. In Henk Bloemhoff, Jurjen van der Kooi, Hermann Niebaum en Siemon Reker (red.), Handboek Nedersaksische Taal- en Letterkunde, Assen: Van Gorcum
  6. Neerlandistiek. Online tijdschrift voor taal- en letterkunde: artikel 'Pas verschenen: Jaorboek Nedersaksisch 1 (2020)' (7 december 2020)
Nuvola apps ksig.png Dit stok is eschreven in et Stellingwarfs van de Kop van Overiessel.