Borkeld

Uut Wikipedie, de vrye encyklopedy
Naar navigatie springen Naar zoeken springen
Jeneawerbeaze
Grafheuwel

De Borkeld is ne boerskop in de Tweantse gemeente Riesn-Hooltn. t Wör in elk geval in t 18de joarhoonderd beskrewen toew t één boerskop vörmden met Look.

t Ongevear 600 beunder grote gelieknamige natuurgebeed De Borkeld van Staatsbosbeheer wörd van de boerskop of eskeaiden duur de A1. Dit gebeed ligt tusken de plaatsen Maarkel, Hoolten en Riessen.

t Natuurgebeed besteet oet joonk bos, grote stukken heade, leemkoelen, akkers, gröslaanden en n stukken hoogvenne. t Bos is tusken 1930 en 1950 an eplaant. Hier he'j ook t grötste veeld jeneawerbeazen van Neerlaand. t Is n glooiend gebeed: n heugsten top, de Freeskeboarg, ligt op 40 meter, t leegste peunt op 13 meter boawen de zeespegel. An n raand van t gebeed, kort bie Hoolten, steet n infopeunt van t IVN.[1] Duur Staatsbosbehear zeent verskeaidene waandelroutes oet ezat, dee't met pöalkes markeerd zeent.[2]

De Borkeld is ook n archeologies resservaat. 13.000 joar terugge warren der al jager-verzamelders. Det is an eteund met de veundst van steenbielen, hoedkrabbers en aandere woarktuge. De prehistoriese grafheuwels en neerzettingsplaatse dee't der eveunden zeent, zeent tusken de 6.000 en 4.000 joar oold. In 1997 zeent n antal grafheuwels duur de Rijksdienst voor het Oudheidkundig Bodemonderzoek op eknapt.

De Leemkoelen in t gebeed zeent ontstoan duur leemwinning vuur t maken van bakkeie. Ze zeent vief of mear meter depe, en duur biezeundere umstandigheden komt der n poar aparte plaantensoorten vuur. Al in t 18de joarhoonderd was der ne pannenbakkerieje, woervan at de pannen in Tweante good verkocht wörden.[3]

De A1 is in de zeuwentiger joaren van t 20ste joarhoonderd dwars duur t gebeed hen an elegd. Duurdet n antal natuurbeskoarmers völle kabaal hebt emaakt bie de regearing, is der op t zuden van Riessen nen bocht in de weg emaakt, um t biezeundere jeneawerbeazenveeld te ontzeen. Op deezelfde stean wör in 2003 ne oawerstekplaatse vuur de deers (ekodukt) emaakt, en doarnöast ne oawerstekplaatse vuur fietsers en waandelders.

In november 2009 wör op de Borkeld, kort bie Maarkel, n boerendoarp oontdekt van 6000 joar oold. Van t doarp zelf was niks mear oawer, mear in de groondloagen was nog wal de ofdruk van de gebroekte bouwmaterialen te zeen. t Warren ongevear 10 huuze.[4]

Bronnen / wellen:
  1. http://www.ivnmarkelo.nl/index.php?pagina=nwitten
  2. http://www.staatsbosbeheer.nl/Activiteiten/Borkeld/Wandelroutes%201-5%20km.aspx
  3. Overijssel, Nederland in vroeger tijd deel XXXII, oorsproonkelike oetgawe 1803.
  4. Twentsche Courant Tubantia, 5 dec 2009, 6000 jaar oude nederzetting gevonden bij Markelo