Barcelona

Uut Wikipedia, de vrye encyklopedy
Kollazie van Barselona. Boawnan 22@ Zaakndistrikt, leenks in middeln de Sagrada Família-koarke, rechts in middeln et Camp Nou-stadion, leenksoonder Kasteel van de dree draakn, -middeln Palau Nacional en rechts et W Barcelona-hotel

Barselona (offisjele skriefwieze: Barcelona, oetsprekn as barse-LOOna), in et Katalaans bərsəˈɫonə en in et Kastiljaans barθeˈlona), is de heuwdstad van Katalonië en de éénnoa-grötste stad van Spanje noa Medrid. Barselona hef 1.620.943 inwonners[1] op ne oppervlakte van 101.4 veerkaante kilometer. Et versteadelikte gebeed van Barselona strekt skoonwal töt wied boetn de stadsgreanzn. Hier wont 4,5 miljoen inwonners op 803 kilometer in et veerkaant.[2][3]. Doarmet is Barselona et op vief noa dichtstbevolkte gebeed van Europa, op Paries, London, et Ruhrgebeed, Medrid en Milaan noa. Et is de grötste metropool an de Middellaandse Zee. Et ligt an de kust tusken de oetmoondingn van de riviern Llobregat en Besòs en ligt op et westn teegn n boargraand Serra de Collserola, den't 512 meter hoge is.

Barselona wör stichtet duur de Romeinn. Et wör al rap de heuwdstad van et Groafskop Barselona. Noa at et wör inliewd bie et Keuninkriek Aragon, wör et de belangriekste stad vuur de Kroon van Aragon. De stad is verskeaidene moaln beleagerd. Et hef ne rieke kultuur en is doarumme n belangriek middelpeunt vuur kultuur en toerisme. Vuural belangrieke arzitektoniese woarkn van Antoni Gaudí en Lluís Domènech i Montaner trekt völle volk. Disse geböwwe stoat op de wearldoarfgoodlieste vna UNESCO. Et heuwdkantoor van de Mediterrane Unie zit in Barselona.

In 1992 wördn dr in Barselona de Olympiese Spöln ehooldn. Doarnöast zeent dr regelmoatig belangrieke vergaderingn, sportgebuurns en kulturele oetstallingn in de stad. Barselona is vandeage n dag ene van de grötste toeristntrekkers van de wearld en spölt op wearldnivoo ne belangrieke rolle in haandelszaakn, kommersie, vermaak, media, mode, keunst en weetnskop. Hierduur steet Barselona te book as wearldstad.[4] Et is de op dree noa belangriekste economiese stad van de EU, met ne oetvoor van € 177 miljard.[5] Barselona is een middelpeunt vuur transport, met nen belangriekn haawn en n vleegveeld wat mear as 35 miljoen reaizigers per joar krig. Et hef n oetgebreaid weagn- en spoernetwoark.

verwiezingn[bewark | bronkode bewarken]

  1. Instituto Nacional de Estadistica. "Population of Barcelona". 25 meart 2013
  2. Demographia: World Urban Areas, meart 2013
  3. Eurostat. Population and living conditions in Urban Audit cities, larger urban zone (LUZ)
  4. Globalization and World Cities (GaWC) Study Group and Network. "Inventory of World Cities". Bekekn op 1 december 2007
  5. Pricewaterhouse Coopers. "Global city GDP rankings 2008–2025". 16 december 2009