Atlantis

Uut Wikipedia, de vrye encyklopedy
n Koart van woar of Atlantis legen hebben zol

Atlantis is de noam van n legendoarisch aailaand/kontinìnt, dij om en bie 12.000 joar leden ondergongen is deur n grote störmvloud. Volgens de legende, dij veur t eerst ien bronnen veurkomt ien n stok van de Graikse filosoof Plato, zol dit aailaand legen hebben ien wat wie nou de Atlantische ozeoan nuimen. Soamen mit t aailaand Lemuria, dat ien de Grote ozeoan legen hebben zol, was der op Atlantis n grote en hoog ontwikkelde geselschop, dij noa de grote störmvloud noar de kontinìnten van vandoag kommen is en zok weeropbaauwd het ien onder aander de Maya, de Sinezen, de Egyptenoaren en de Babyloniers. Atlantis zol dus de boases wèst hebben veur de beschoaven. Dizze theorie leefde veuraal ien de oldhaid, môr ien 1882 brocht Ignatius Donnelly t weer terug ien de aandocht.

t Bestoan[bewark | bronkode bewarken]

Of Alantis echt bestoan het wait man nait. Veul waitenschoppers goan der van oet dat Atlantis nait bestoan het. Toch kommen der elk joar weer bouken oet mit theorien over dit mysterieuze kontinìnt. Zo stoan overaal op de wereld pyramiden, zo as ien Egypte, Mexiko, Guatamala, Ekuador, Bolivia, Bosnie, Spanje, Graikenlaand, Röslaand, Sina, de Filepinen en ien de zee tuzzen Japan en Taiwan. Theoristen verbinden dizzent apmoal mit nkander en mainen dat zai apmoal vanôf dezulfde kulturen van Atlantis en Lemuria kommen zollen. De pyramiden zollen n spirituwele funksie had hebben en zai zollen broekt wezen om kontakt tou zuiken mit boeteneerdse wezens.

De grote störmvloud dij Atlantis en Lemuria overstroomd het, zol dezulfde vloud wezen as dijent dij ien de biebel nuimd wordt ien t verhoal van Noach. Waitenschoppers dij veur dizze theorie binnen, hebben dit onderzöcht en mainen dat dizze grote störmvloud veroorzoakt is deurdat de tektonische ploaten van de eerde dij ien de grote ozeoan en de atlantische ozeoan bienkander kommen, eerst tegen nkander aankwammen, woardeur de kontinìnten ontstonden, môr loater weer van nkander ôfdreven. n Aander theorie is dat doudestieds aan t ìnde van n iestied de gleesjer smolten en t woater doarvan t kontinìnt overswommen.

De tegenstanders van Atlantis vouern as belaangriekste aargumìnten dat der behaalve Plato, der gain enkelde opschrift van Atlantis vonden is en dat as der n overkoepelende kultuur wèst het dat man overaal ien de wereld wel t zulfde schrift vonden hebben zol mit op zien minst ain verwiezen noar Atlantis. Veurstaanders zèggen dat man wel rekening holden mout mit t feit dat der n hail ìnde kennis van ienhaimse kulturen verloren goan is ien de kolonioale tied en mit t ôfbranden van de bibliotheek van Alexandrie. Ook zainen de tegenstaanders dat overaal ien de wereld apaarte ontwikkeln van geselschoppen, ien stee van n ien ais opkommende hoge kultuur. n Aargumìnt dat veurstanders hier tegen hebben is dat de boases ien elke kultuur t zulfde was, môr dat zai zok doarnoa wieder ontwikkeld haren en dat aine zien haimlaand vernietegd worden zol, man dizzent nait zo môr even weer opnij opbaauwen kon aargenswoar aans ien de wereld. Toch binnen de maiste waitenschoppers nait overtuugd en wordt der deur de mainstream waitenschoppers vanoet goan dat Atlantis nait bestoan het.

Aanhong en broeken ien t aaldoags[bewark | bronkode bewarken]

Luu dij hier deurgoans ien leuven, binnen voak lid van de New Age Movement of aander spirituwele groepen. Gounent dij ook n staarke leuver wazzen, wazzen Adolf Hitler en Heinrich Himler, dij leufden dat t arische ras de oorspronkelke bewoners wazzen van Atlantis, wat oetìndelk de holocaust tou gevolgen haar. t Idee krigt tegenswoordeg aal meer aanhong, ondanks dat der aal meer bewiezen weerlègd worden deur waitenschoppers. Nevvens summege leuvers waiten de hoge luu as de illuminati, n gehaim genootschop, t Vatikoan en de Ridders van Maalte dat Atlantis echt bestoan het en dat dit ain van de rezens is dat dizze organisoatsies en genootschoppen zo gehaimzinnen dounen over woar zai presies veur stoan en wat zai waiten. Dit wordt ook leufd deur komlottheoristen.

Zo as al nuimd, kommen der joarlieks wel bouken oet mit nije theorien of soamenvattens doarvan over Atlantis. Ook ien op schaarm binnen der verschaaidene films dij goan over Atlantis, zo as de Disney film Atlantis: The Lost Empire, Tomb Raider en de riege Stargate Atlantis.

Boetende heenwieze[bewark | bronkode bewarken]

Wikimedia Commons Commons: Atlantis - plaatjes, filmkes en/of gelüüdsbestanden.