Suze Sanders
Suze Sanders (schrieversname van Albertien Klunder-Hof) (Goes, 1953) is een dichteres, schriefster, vertaalster en interviewster die schrif in 't Drèents en Nederlaands. Sinds de jaoren tachtig publiceert ze in letterkundig tiedschrift Roet en is ze doende in de Drèentse schrieverije.
Levensloop
[bewark | bronkode bewarken]Sanders gruide op in Rotterdam en 't tussen Rotterdam en Den Haag elegen Pienacker. Heur olders kwamen uut Drenthe en preuten Drèents mit menare. Nao de Hogerebörgerschoele zat ze een jaor op de pabo en deu ze een studie directie-secretaresse. Ze warkte bij scheepvaortmaotschoppijen in Rotterdam en Oslo. Daorop volgde een studie Noors in Stad, oferond in 1989. Ze is etrouwd.
Schrieverije
[bewark | bronkode bewarken]Vanof 1986 hef Sanders taal- en literetuurcursussen van Radio Noord evolgd. Ok vanof det jaor had ze wark staon in Roet: bename Drèentse en wieder ok Nederlaandse gedichten en Drèentse aoverzettings van Noorse gedichten en verhalen. Nederlaandse aoverzettings van heur stunden ok in tiedschrift Raster. In Drèents tiedschrift Oeze Volk had ze gedichten veur kiender staon. In 1991 kreeg ze de Reyer Onno van Ettingen-pries, de anfieterpries van Roet.
Sanders zat een steugien in 't bestuur van de Drentse Schrieverskring asok in de redactie van Roet. Veur Radio Drenthe deu ze columns en was ze redactrice van 'Dichter van de maond'. Veur de Taolkraant van 't Huus van de Taol en de opvolger van det blad, Zinnig, hef ze interviews eholden.
De titel van Henk Nijkeuter zien wark Waor roet en blommen wortel schiet in 't veld. Geschiedenis van de Drentse literatuur 1945-2015 (2016) is ontliend an een riegel uut een sonnet van Sanders.
Uut heur wark
[bewark | bronkode bewarken]mien eigen gids weur ik in 't vrumde laand
waorvan mij in 't verleden was verteld
een laand waor zaand en waoter saomengaot
waor wandelaors heur sporen achterlaot
op paden, deur een zee van kleur umraand
waor roet en blommen wortel schiet in 't veld
(Uut 't gedicht 'Tussen Goes en Grunning')
Dichtbundels
[bewark | bronkode bewarken]- As langs de muren d’aovend slöp (Zuudwolde: Het Drentse Boek, 1992)
- Een zeum van locht (Zuudwolde: Het Drentse Boek, 1996)
- Alsof de steen spreekt (Zuudwolde: Het Drentse Boek, 2001)
- Langs de vloedlien van de winter (mit cd, Zuudwolde: Het Drentse Boek, 2006)
- Veenbraand (Beilen: Het Drentse Boek, 2013)
- Vioolties an zee (Beilen: Het Drentse Boek, 2018)
Bronnen
[bewark | bronkode bewarken]- Rouke Broersma (red.) (2003), Scheupers van de taol: Bloemlezing van de Drèentse Schrieverij 1837-2003, Zuudwolde: Stichting Het Drentse Boek (blz. 200-204)
- Huus van de Taol aover Suze Sanders
|
Dit artikel is eschreven in 't Zuudwest-Drèents. |