Vraiskelo
Vraiskelo (Nederlaands: Vriescheloo) is n loug (dörp) ien de vrougere gemainte Wedde-Bennewold (Nederlaands: Bellingwedde). t Loug haar begun 2005 986 ienwoners.
Noam en schiednis
[bewark | bronkode bewarken]Woar de noam Vraiskelo vot komt is nait haildal zeker. Vraiskelo kin verwiezen noar de Vraizen dij zok vestigt hemmen bie t bosk (loo). t Kin ok wezen dat Vraiskelo n verwiezen geft noar n nijer dail van Lutjelo. Lutjelo, ok n lutje loug nait wied vot van Vraiskelo, is n old ploatske en betaikent lutje bosk (Nederlaands: klein bos). Aan t inde van de middelaiven, dou t klien (veen) veur t mainste dail vot was, verhoesde man zok noar n zandrogge dij bie de dörpstroate lag. Ok de oksediek (ossedijk) haar veul betaikenis ien dij tied. Dizze stroate was n belangrieke handelsroute noar Winschoot, Bourtang en Münster. t Loug haar zokzölven vörmt ien de tied van de Franse overheersen mit de 18de aivse kìrke van Vraiskelo as t middelpunt.
Dieverdoatsie
[bewark | bronkode bewarken]Ien Vraiskelo staait n meulen nuimd De Korenbloem. Dizze meulen oet t baauwjoar 1895 is ain van de attrakties dij t loug het. Ok het Vraiskelo noatuur mit schiere wandelpoaden. t Dörpke het nait veul bedrievighaid, mor de leste joaren binnen der aal meer lu dij veur zokzölven begunnen binnen. Ien t begun van de 20ste aive waarkten mensken mainstieds ien de landbaauw. Ok het ien Vraiskelo n bierbraauwerij stoan. Dieverdoatsie van dij tied beston oet kermis en vernuvern mit daaierhandel. Noa de kraig vörmde zok n nije kern mit veul nijbaauw.
Bienoamen
[bewark | bronkode bewarken]Vraiskeloërs hemmen krekt as aandere dörpslu ok n bienoam. Ain bienoam dij man broekt is aindekukens. n Twijde noam dij man ok heurt is gaanzekukens. Noast dizze twij noamen bestaait der nog n daarde bienoam: eerappeldobben.
|
Dit artikel is skreaven in et grönningsk. |