Van den vos Reynaerde

Monument van Reynaerde in Hulst, de meugelijke plekke waor 't epos eschreven is

Van den vos Reynaerde is een middelieuwse Oost-Vlaamse (algemien as Middelnederlaands ekenmarkte) bewarking van 't dierepos aover Reintien de vosse, det in veule variaanten en talen bestiet. 't Gedicht telt 3469 varsriegels en is waorschienlijk tussen 1257 en 1271 ontstaone, meugelijk in de plaatse Hulst (vandage de dag in Zeeuws-Vlaandern). 't Verhaalt van de loeke vosse Reynaerde, die rooft, liegt en moordt en daorumme op de hofdag van keunink Nobel de leeuw edaagd wördt um hum te verantwoorden. Hieltied weer is e de aandere dieren te slim of.

't Gedicht is eschreven deur iene 'Willem die Madocke maecte', zoas e humzölf indentificeert; Madocke mut een verleuren egaon wark wezen. Zien Reintienbewarking is miest ebaseerd op Le Plaid ('t Pleidooi), 't eerste diel van een grotere Fraanstalige verzameling vossenverhalen, Le Roman de Renart deur Perrout de Saint Cloude. Die zien wark bouwde op zich weer op eerdere versies.

Saksische en aandere bewarkings

Um de kwaliteit van 't wark, en um de invloed die 't töt vandage de dag hef, wördt Van den vos Reynaerde eziene as een heugtepunt in de Middelnederlaandse schrieverije. 't Epos wördden in de 14de ieuw bewarkt en uutebreid töt 't eveniens Vlaamstalige Reinaerts Historie. Dit gedicht voerde, via een daorop ebaseerde, miest verleuren egaone 15de-ieuwse drok, töt een Middelsaksische versie van 't epos, 't in 1498 in Lubeek edrokte Reynke de vos. Zowel langs de Saksische Reynke (die indirect töt Goethe zien Reineke Fuchs uut 1794 leidde) as langs aandere wegen hef Van den vos Reynaerde veule invloed ehad in mit name Noord-Europa.

In de twintigste ieuw wördden van Van den vos Reynaerde Nedersaksische bewarkings emeuken deur schrievers as Jelte Dijkstra uut Grunning en Jan Naarding en Klaas Kleine uut Drenthe.

Dit artikel is eschreven in 't Zuudwest-Drèents.