Gebruker:Stellingwerver
| nl | Deze gebruiker heeft het Nederlands als moedertaal. |
| stl | Disse gebruker het Stellingwarfs as memmetael. |
| en-2 | This user is able to contribute with an intermediate level of English. |
| de-1 | Dieser Benutzer hat grundlegende Deutschkenntnisse. |
Hoi meensken,
Ik heb aorighied an et Stellingwerfs en daorveur schrief ik as ik tied heb ok graege een artikeltien.
- Artikelen waor ik mit begonnen bin: De Stellingwarver Schrieveri'je Pries, Hendrik Johannes Bergveld.
- Artikelen waor ik niet mit begonnen bin, mar waor ik wel een aorige bijdrage leverd heb: Berkoop, Stellingwarfs, Duuts en Zweeds.
- Daornaost nog een hiele protte kleine bewerkingen.
Mien naeme is niet Stellingwarver mar Stellingwerver. Soms kuj' de a wel heuren, mit naeme in Ooststellingwerf, mar veur de meensken om mi'j henne liekt dat meer Drents. Zo is d'r nog wel meer variaosie in et Stellingwerfs. Sommige meensken zeggen anders, anderen weer aanders en dan bestaot d'r ok nog de variaant eers. Ik schrief liekewel de standaordvariaant van et Stellingwarfs, mit hier en daor vanzels wat ruumte veur eigenhied.
De Stellingwarver schrieftael en Wikipedia
[bewark | bronkode bewarken]Et Stellingwarfs is een machtig mooie schrieftael. An de iene kaant wiekt de spelling niet te veul van et Nederlaans of en an de ere kaant geft et alle ruumte veur de Stellingwarver eigenhied. En wie Stellingwarfs lezen kan, die kan ok goed Drents lezen (eersomme is lastiger deur oonze woordeschat). We maeken ok gebruuk van de letter ö om woorden as 'dörp' en 'grös' te schrieven. De lezers hebben daor gien bezwaor. Aj' de Stellingwarver boekverkoop vergelieken mit die van de ere Nedersaksische of Nederduutse dialekten, dan gaot dat best goed. Van et Stellingwarfs kuj' een protte zeggen, mar d'r is zo staorigan een starke schrieftradisie ontstaon. Ik kan haost wel zeggen dat et Stellingwarvers zuver in de Eerste Divisie van de standaordtaelen staot. Weblogs, boeken, schoelen en perveensie. Allegeer warken ze mit disse schriefwieze.
Wi'j wonen as Stellingwarvers in de perveensie Frieslaand en daor biwwe gelokkig. Wi'j vienen et mooi om Drents te lezen en vienen de geliekenissen mit et Nedersaksisch en Nederduuts machtig interessaant. Mar iedere keer komt de konfrontaosie om te vechten veur oonze eigenhied. Dat gevuul bekruupt mi'j now ok een betien op disse Wikipedia.
Op disse Wikipedia zol ruumte veur alle dialekten wezen, mar de Ni'jsaksische schriefwieze wodt hier behoorlik naor veuren brocht. Dat is ok iene van de redenen waoromme ik hier wel schrief, mar lichtkaans minder as ik zol willen. Et artikel Fraans is markeerd as Stellingwarver artikel. Aj' Stellingwarfs praoten kunnen dan vaalt et vot op dat d'r in dit artikel al dik vuuftien woorden in de veerste veerte niet op et Stellingwarfs lieken. Dat het niks mit Stellingwarfs te maeken en dat vien ik meer as jammer.
In een protte Nedersaksische en Nederduutse krieten is d'r gien echte schrieftael. Vaeke bin d'r meerdere schriefwiezen en dat is ok niet best. Ik daenke ok dat bepaolde gebieden ok prima saemenwarken kunnen. Bi'j et Noordnedersaksisch (in de Duutse dielstaoten Bremen, Nedersaksen (los van Oostfrieslaand), Hamburg en Sleeswiek-Holstein) gebeurd dat al laange. Et saemenwarken tussen de Nedersaksers/Nederduutsers is een prima ding. Veural mit deurgaon. Et projekt Ni'jsaksische schriefwieze vien ik interessaant, mar a'k et artikel Fraans zie, dan is dat de dood in de pot veur et Stellingwarfs. En daor is mien greens. Ik doe graeg waeter bi'j de wien, mar dit is oold waeter mit een peer druppies wien. Niet te zupen en d'r is vusen te veul ofstaand tot oonze daegelikse tael.
Ik geleuf wel dat alle dialekten beter saemen kunnen warken. Et bollegien mit a (å) kuj' in et grootste diel van et taelgebiet wel deurvoeren. Een peer algemiene schriefkonvensies bin wisse wel mogelik en realistisch. Mar ik geleuf niet dat de ere dialekten begriepen wat pake, beppe, heit, mem, een protte, eer, liekewel, wis, tegere, enz. voor woorden bin. Daoromme bin ik veur een evolusie en niet veur een halfbakken revolusie. Now, vot mar weer. Bin beni'jd of d'r hier goenend bin die d'r ok zo over daenken.