Hendrik Johannes Bergveld

Uut Wikipedia, de vrye encyklopedy
Nå navigaty springen Nå söken springen

Hendrik Johannes Bergveld (Appelsche, 20 december 1902 - Oosterwoolde, 14 oktober 1966) is iene van de bekendste Stellingwarver schrievers van de tied veur de Stellingwarver Schrieversronte. Naost zien verhaelen en dichtwark schreef hi'j ok stokken over et Stellingwarfs en over de volkskundige biezunderheden van de Stellingwarver regio. Et gaot dan veural om de kraante daor Bergveld et meerste van zien verhaelen en riempies in naor veuren brocht: De Ni'je Oost-Stellingwarver van nao de Twiede Wereldoorlog en De Oost-Stellingwarver van veur de oorlog.

Wark[bewark | bronkode bewarken]

Et meerste van Bergveld zien wark verscheen postuum in De Oolde Pook (1971) en in de Klaeterjaegers (1976). Een vuul oolder wark van Bergveld is De Stellingwervers en hun dialect en wodt soms ok wel as zien dadde "boek" beschouwd. Dat wark was feitelik een groot artikel uut de Drentsche Volksalmanak van 1949. In et boek Bergveld lest veur uut eigen wark (2013) is niet allienig et wark uut de veurige drie boeken te vienen, mar ok aorig wat teksten die nog niet eerder in drok west hebben of die aj' zels mar mit muuite in kraanten en zo weervienen zollen. De stokken in Bergveld lest veur uut eigen wark bin opgeerd en bi'jienbrocht deur Henk Bloemhoff.

Naogedaachtenis[bewark | bronkode bewarken]

Bergveld schreef haost al zien leven in een leesbere, konsekwente spelling, die mit naeme ansleut bi'j gewoonten in Drenthe en toegelieke bi'j de uutgangspunten van de spelling van et Nederlaans. An et aende van de jaoren zestig wodde Bergvelds schriefwieze overneumen deur de Stellingwarver Schrieversronte en in 1976 nog es officieel vaastlegd.

In 1981 wodde de H.J. Bergveld-pries insteld deur de Friese gemientes Weststellingwarf en Ooststellingwarf, een pries veur schreven of spreuken Stellingwarfs (uut Frieslaand, Overiessel of Drenthe) van literaire of taelkundige aord.

Boeken[bewark | bronkode bewarken]

  • De Oolde Pook, uutgeven deur de Kulturele Raod van Oost-Stellingwarf in 1971
  • Klaeterjaegers, uutgeven deur de Stellingwarver Schrieversronte in 1976
  • Bergveld lest veur uut eigen wark, uutgeven deur de Stellingwarver Schrieversronte in 2013, ISBN 978-90-6466-168-6