Sydenstaert

Uut Wikipedia, de vrye encyklopedy
Nå navigaty springen Nå söken springen

De sydenstaert (Bombycilla garrulus) is en voagel, dee binnen de ordening Passeriformes de familen van de sydenstaerten (Bombycillidae) tohöyrt.

Markteykens[bewark | bronkode bewarken]

Kyk up de gealen un witten partyen an de vlünkenspitsen.

Med syn 18–20 cm het de sydenstaert üm un by de grötde van en sprey un is kompakt bouwd med en grouten kop. De spanwydde van de vlünken ligt twüsken 32 un 36 cm un weagen deit de sydenstaert twüsken 50 un 75 g.[1] Licht wedderkennen kan eyn den sydenstaert an syn upvallen hårtop un de beigerosa klöör. Karakteristsk sint ouk de swarten plakkens üm de ougen un an dat kin, jüst so as dat swart-wit-geal-roude munster an de spitsen van vlünken un staert.[2]

Vorspreyding un leavensgebeed[bewark | bronkode bewarken]

Vorspreyding van den sydenstaert

Bröden deit disse voagelspecies in de noordensten deylen van Eurasien un noordwesten Noordamerika, wårvan de euraaske subspecies den weatenskopliken name B.g. garrulus drigt un de noordwestamerikaanske den name B.g. pallidiceps. De sydenstaert is en deyltrekker, wat bedüüdt, dat de populatioon deylwyse wintertyds nå süden hen trekt, man deylwyse in dat bröödgebeed blivt. Dat trekkend hangt stark af van de togänglikheid nå wisse beiensoorten, sünderlik van den kwitsenboum, in de brööd- un trekgebeden.[3] Ouk in dat sassiske språkgebeed is de sydenstaert medto wintertyds as invasioons- or dwaalgast to bemöten.

Vöärtrekkingswyse leavt de sydenstaert in nadelhölter, man ünder de trektyd höldt dee sik ouk in parks, gaardens un ander minsklike ümgeaving up.[4]

Leavenswyse[bewark | bronkode bewarken]

As vödelse prefereert de sydenstaert beien, såd un rüggråtslouse deerten. [5] Wintertyds leavt hee vöäral van beien un vrit do blangen kwitsen ouk machandelbeien un beien van gaardenstrüker. Dårby warkt syn leaver so effektiv, dat anskynlik ouk öäverrype beien em ni duun maket. [6] Dat sydenstaerten van öäverrype beien duun wardet, is indedåd wul man en urbane legende. Weatenskoplik het sik dat betto noch ni bewysen låten un anseens dat syn leaver üm de 10% van syn lyv uutmaakt un hee alkohool neagen mål so gauw vorbrent as en minsk, is dat ouk ni al to wårskynlik.[7]

Voordplanting[bewark | bronkode bewarken]

Syn nest bouwt de sydenstaert in de telgens van junge nadelböyme as dannen un vüren. Twüsken meimånd un junimånd legt dat wyven 4–6 eier, dee dat üm un by en twey weakens tyd bebröden deit. Achteran voderet de ölderen ear jungens 20–25 dage, dårvan 15–17 in dat nest.[8]

Referensen[bewark | bronkode bewarken]

  1. P. Koskimies (2019). Linnut – Lajiopas. readme.fi
  2. L. Svensson (2017, andra reviderade upplagan). Fågelguiden – Europas och Medelhavsområdets fåglar i fält. Bonnier Fakta
  3. T. Solonen, A. Lehikoinen & E. Lammi (2010). Uudenmaan linnusto. Helsingin Seudun Lintutieteellinen Yhdistys – Helsingforstraktens Ornitologiska Förening Tringa ry/rf
  4. P. Koskimies (2019). Linnut – Lajiopas. readme.fi
  5. LuontoPortti: Tilhi
  6. P. Koskimies (2019). Linnut – Lajiopas. readme.fi
  7. J. Korteniemi (2016). Syksyn taikaa: Humaltuvatko tilhet pihlajanmarjoista? Tiedetuubi
  8. P. Koskimies (2019). Linnut – Lajiopas. readme.fi
Nuvola apps ksig.png Disse artikel is skreaven in holsteynsk, in de Nysassiske Skryvwyse.