Ströymkanål van Hackfort

Uut Wikipedia, de vrye encyklopedy
Nå navigaty springen Nå söken springen

Et Ströymkanål van Hackfort of et grööne kanål van Hackfort is nen wåtergang in den Achterhook in Gelderland. Et wyr egråven in 1952 en is in gebruuk enöämen in 1955. Et afwåteringskanål sörget vöär de uutwåtering van med nåme den Veengout en de Båkske Bekke tydens hougwåter as et gemål Båkske Bekke mut pumpen.

Funktsy[bewark | bronkode bewarken]

Et kanål is as gröön kanål untwörpen vöär de lossing van de Hackfortske Bekke, nåmelik as de Båkske Bekke neet meyr sül können lösen vanweagen hougwåter. Dat sül nen stük of 30 dågen per jår et geval weasen. Et kanål beginnet ten noorden van Wichmond, dår wår den Veengout en de Hackfortske Bekke oavergåt in de Båkske Bekke en endiget 3 kilomeater wyder med nen uutwåteringssluus in den Yssel, under den weg van Zutfent når Hummelo.

Vanaf et uutströymwark in den Yssel töt an de höyge grunden by Hackfort funktsioneret de kåde langs de südsyde as slåperdyk en dee langs de noordsyde as bandyk.

De anlegkosten van et kanål bedrogeden destyds ƒ 425.000.

Dichting van de Båkske Oaverlåt[bewark | bronkode bewarken]

Et kanål is anelegged vanweagen de dichting van den Båksken Oaverlåt. Den oaverlåt was nen låg gedeylde in den Ysseldyk ten süden van Zutfent. De bedooling dervan was dat wåter van dykdoorbråken ströymupwårts langs den Yssel via dit verlågede gedeylde terügge in den Yssel kön ströymen. Den oaverlåt hevt noit good efunktsionered. In plåts dårvan ströymeden der reagelmåtig wåter landinwårts, wårdöär et gebeed ten süden van Zutfent deyls under wåter kwam too stån. Tüsken 1905 en 1946 gebureden dat seaventeen mål. Nåst et dichten van den oaverlåt wyr de uutwåtering van de bekken verbeaterd. Hyrvöär wyren gemålen ebowd en nye mundingen egråven: et Afleidingskanål vöär den Berkel en et Ströymkanål van Hackfort.

Al snel bleek dat et kanål völle våker en völle meyr wåter sül vooren dan was edacht. Med nåme med de eigenåren van de landgooder Suideras en Hackfort is jårenlange uneynigheyd ewesd oaver den status van et kanål en de too betålen vergoodingen vöär et gebruuk dervan. Et Wåterskap Båkske Bekke most den undergrund en anliggende kåden vöär ses jår van de eigenåren pachten. De provinsy nam den pacht in 1961 van et wåterskap oaver en probereden de grunden too kopen, mår dat is mår deyls elükked.

Nuvola apps ksig.png Dit artikel is eskreaven in et achterhooksk.