Steyntyd

En steynen Oldowan-gerei, med düdelik bewarked snydvlak

De steyntyd of et steynen tydperk is dee tyd in de geskedenisse van de menske dat de lüde gerei van steyn gebrükeden en noch neet wüsten wo as se metaal musten maken. Wanneyr de steyntyd is of was, hangt af van de steade. Vöär wat volker up Borneo en Nyguinea is de steyntyd noch neet sou lange leaden vöärby, vöär wat volker uut et ströymgebeed van de Amazone is et noch altyd steyntyd.

Et kan good weasen dat se der in dee tyd ouk höltene warktüge by nöäst makeden of gerei van bütte. Ümdat holt makkelik vergeyt, is der uut dee tyd weinig van oaverebleaven. Ne uutsündering hyrup sint en paar höltene spears van ungeveyr 350.000 jår old, evünden in 1994 in et düütske Schöningen. Dårmed wör anetöynd dat de vöärloupers van de menske aktiv hen jagen güngen en neet blouts aas atten, wat de archeologen lange meynden.

Meysttyds verdeylt de geleyrden de steyntyd in dree vlakken:

• et paleolithicum, of öldere steyntyd. Den duurden van ungeväär 2,5 miljoon jår weaderümme töt et ende van de lätste ystyd, ungeväär 10.000 jår weaderümme.
• et mesolithicum, de middensteyntyd. Dårmed doolt se up jager-gadderaars van nå de lätste ystyd.
• et neolithicum, of de jüngste steyntyd. Dat verwist når volker dee et vöäral van buren musten hebben.

An et ende van de steyntyd deaden wat lüde al mangs warktüge van koaper maken, wårdöär archeologen nu spreaket van de koapertyd, koapersteyntyd of chalcolithicum. Dårnå küm de bronstyd en möägelik noch de ysertyd. Dat lätste geldt neet vöär Mesopotamie en Egypte, ümdat dee in dee tyd al begünden med skryven. Dat bedüden dår et ende van de prehistory en soudöänig kan dår neet oaver ne ysertyd spröäken worden.

Wonneyr en wolange de steyntyd was, hangt af van wat vöär steade as de geleyrden bekyket en wo as se et definieert. De öldere steyntyd begünde ungeväär 2,5 miljoon jår weaderümme do as de eyrste menskachtigen gerei van steyn begünden te maken. De steyntyd begünde düs al vöärdat Homo sapiens bestünd. Toch is et by steynder lastig te seggen of ne bröäke nu med upset döär lüde maked is of döär tovallig ungelük. Ne gode anwysing is as der vöäle steynder med ne skarpe bröäke by mekander vünden wordet. Den oaverstap van koaper up brons begünde tüsken 6000 en 2500 vöär Kristus. In noordwest Europa güng et vöäral up dat lätste tydstip an.

De öldste steynen warktüge sint evünden in oustafrika en in et bysünder Kenia. Disse kultuur wör de Oldowan enöömd. Warktüge wörden emaakt döär keien up mekander te hauwen, soudat der skarpe spöänders ofbröäken. Dee deenden dan as messen, bylen, skrapers en boaren. Toch is et lastig te seggen of et eyrst bewüst wör edån. Ouk chimpansees en andere deers gebruket wal es keien en warktügen üm eaten te bewarken.