Stappest

Stappest (ok wal Stapper^[1]; Nederlaans: Staphorst) is een dörp in de Nederlaanse previncie Oaveriessel. 't Lig in de gelieknamige gemiente.

Dörpskarakter

Samen mit Roevène vörmt Stappest een typisch veurbeeld van lintbebouwing an de Olde Rieksweg en (in 't geval van Stappest) de Gemienteweg. Opvallend an Stappest bint de felgrune luken en deuren (mit boaven de veurdeure dikkels een zogenaamde lèvensboom) en de klederdracht die vrogger van jong töt old deur mannen en vrouwen edragen wordden, mar now hiel gauw ofnimt. Kiender die permanent of allinnig in de winter in klederdracht loopt, bint al een zeldzaamheid. Ok volwassen mannen zie-j der niet meer in lopen, op een paor bejaorde mannen nao. Volwassen vrouwen die in klederdracht loopt, bint der nog wel aordig veule. In 1937 is in de Algemiene plaatselijke verordening vastelegd det 't verboden is "iene op of an de weg zonder zien of heur toestemming te fotograferen".

Karkelijkheid

De gemienschop van Stappest stiet bekend as ien van de miest karkelijke binnen Nederlaand, en is knap esleuten. Der bestaot verschillende geriffermeerde karken van verschillende oriëntaties. De zundagsröst wordt stark in acht eneumen en de karkdiensten in de protestantse karken wördt drok bezocht. De dörpskarke van Stappest is mit umdebi'j 2.300 zitplaatsen ien van de grootste karken in Nederlaand en zit alle zundagen vol.

Op speciale dagen zoas biddag en dankdag bint op Stappest alle winkels, bedrieven en schoelen esleuten. 't Lek dan een normaole zundag, mar de karkdiensten wordt miestal pas 's aovens eholden.

Kunnigheid

In disse lieste vin ie bekende mèensen die op Stappest woont, of ewoond hebt.

Stien Eelsingh (1903-1964), schilderes
Peter Stegeman ('t Stappester boertien) (1840-1922), krudendokter

Citaot

Hoalt de burenplicht ien eere
is op Stappers het parool
En dan klöpt er wèrme hèrten
onder 't gröve kamizool
Zet de tering noa de nering
det geldt hier veur heer en knecht
Het volk zelf en de gemeenschap
Stappers hold zien zaken recht
Felle kleuren langs de wègen
Stappest is traditie vast
Wie niet noa dit volk giet trappen
hef met Stappersen gien last

Uut Hendrik Sterken zien gedicht 'Drie-eenheid'. In: J.P. van den Berg c.s. (1986), Van Reestdal tot Beentjesgraven. Van Kievitshaar tot Kievitsnest, Zwolle: Natuur en Milieu Federatie Overijssel, blz. 53

Uutgaonde verwiezings

Rifferenties

↑ Dr. G.H. Kocks (1997), Woordenboek van de Drentse dialecten. A-L, Assen: Van Gorcum. Ingaank: achterummekiekertien: ' Hen Stapper [Staphorst] um een achterummekiekertien te kopen als antwoord op de vraag waar iemand heen gaat (Ruw)'; Ruw = Runerwold

Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.

Plaatsen in de gemiente Stappest

Hoofdplaats: Stappest Dörpen: Roevène · De Rieverst
Buurtschoppen: Haalfweg · Hamingen · Lankhorst · De Leijen · De Lichtmis (deels) · De Punt · Slingenbarg (deels) · Westhuzingerveld (deels)

Oaveriessel · Steden en dörpen in Oaveriessel Nederlaand · Previncies · Gemientes

[1] Dr. G.H. Kocks (1997), Woordenboek van de Drentse dialecten. A-L, Assen: Van Gorcum. Ingaank: achterummekiekertien: ' Hen Stapper [Staphorst] um een achterummekiekertien te kopen als antwoord op de vraag waar iemand heen gaat (Ruw)'; Ruw = Runerwold

[1]