Sobibor
.jpg)
Sobibor was en vernetigingskamp van de nazi's in den Tweyden Wearldoorlog. Et wör bouwd as deyl van Operaty Reinhard, ne poging üm alle jöäden stelselmåtig uut to moarden. Et kamp lea in en busk by et dörpken Żłobek Duży in et Generale Governoraat van düütsk Polen.
As vernetigingskamp un neet koncentratykamp bestünd Sobibor enkel üm jöäden to vernetigen. Et oavergroute deyl van de gevangenen wör binnen de eyrste paar uur nå ankumst al vergasd. Dee wat neet vermoard wörden, musten helpen et kamp an et draien to holden. Weinigen oaverleavden et meyr as en paar månd. In totaal wörden sou'n 170.000 töt 250.000 lüde ümmebracht in Sobibor, wårmed as et nå Auschwitz, Treblinka un Belzec et doudelikste nazikamp was.
Et kamp küm stille to liggen nå nen gevangenenupstand up den 14. oktober van 1943. Et upstandsplan had twey fasen: in den eyrsten solden koppels gevangenen stillekes de SS-officyren ümmebrengen. In de tweyde fase solden alle 600 gevangenen sik vöär et dagelikse appèl up et middenplein versamelen un med mekander de poorte uutloupen. Et plan löyp in et hunderd nå at der mär elv SS-kearls ümmebracht warren. Dårnå musten de gevangenen untsnappen döär oaver täkkedråd to klimmen un döär en mynenveld to rennen under swår machinegeweyrvüür. Ungeväär 300 gevangenen kümmen leavend et kamp uut, mär 60 oaverleavden den oorlog.
Nå den upstand sloupeden de nazi's et grötste deyl van et kamp üm de gruweldåden vöär et uptrekkende Roude Leyger to verduselen. In de eyrste paar jår nå den oorlog wör et terrein vergeaten un had et kamp weinig naam in undersöken un verslagen van de Holocaust. Et kreag meyr andacht nå ne TV-minisery Holocaust (1978) un den film Escape from Sobibor (1987) uutkümmen. Et Sobibor Museum is nu up de steade to besöken. Noch altyd sint archeologen der gangs med upgraevingen. In 2020 wörden der foto's van et draiende kamp vryegeaven as deyl van et Dådersalbum van Sobibor.