Rock

Rock is ne versamelname vöär verskillende nauwverwante musikstylen med as vöärnaamste kenmark et gebruuk van elektrisk verstarkede gitaren, drums en nen basgitaar.

Rock is tüsken 1950 en 1960 in de Vereynigde Ståten untstån uut ne samensmelting van verskillende stylen as country, rock 'n' roll en rhythm & blues. Med dank an de Britske Invasy in de sestiger jåren rakeden rock vöärdan meyr verspreided oaver de heyle wearld. An et ende van de sestiger jåren untstünd psychedeliske rock. In de söäventiger jåren hardrock en punk. De jåren dårup untstünden new wave, metal en grunge. Rock is rechtevoord sou'n breyd begrip dat vöäle substylen nauliks up mekander lyket. Mangs wordet selvs wat soorten blues, country en popmusik der under reakend.

Wearldwyd is rock rechtevoord eyne van de meystbelüsterde musikstylen. Et hevt ne starke kulturele uutwarking had, med anhangers dee sik up ne bepålde typiske wyse kleydet, uutdrükket en gedraegt. In et neadersassisk is rock de populäärste styl te nömen. In Düütskland hevt de band Torfrock 'n grout anhangerskap, in Neaderland dröög Normaal (en later Jovink) med öäre burenrock by an ne upleaving van et neadersassisk as dagelikse ümgangsspråke.

Bekende internationale bands uut verskillende substylen sint under meyr de Beatles, Rolling Stones, ZZ Top, AC/DC, Muse, Iron Maiden, Nirvana, Red Hot Chilli Peppers en Coldplay.