Riepe (ziedpad)

Uut Wikipedia, de vrye encyklopedy
Ien summege steden mout man de auto dails op de riepe paarkern, zodat der genog roemte over blift op stroat veur aander autos dij der laangs willen.

n Riepe is n dail van weeg. t Is n verhoogd of ôfschaaiden paart van de weeg dat bedould is veur lopers. Op dizze menaair binnen lopers vaileg veur voartugen as autos, fietsers en vrouger veur peerden en koaren. Ien Nederlaand binnen riepen voak tegeld mit rieptegels van standerdiseerde vörm en ôfmeten.

De riepe bestaait al sunt de Reumse tied, dou riepen bedould waren as dreugstee veur t woater dat deur de legerlegende stroaten strulde. De riepen aan baaide kaant wazzen dou verbonden deur stapstainen dij ook bie de riepe rekend worden kon.

Bie oversteekploatsen binnen riepen voak wat verleegd, sikkom tot aan hoogte van stroat tou. Dit wordt doan zodat mìnsken mit kinderkoaren, rollators of leveransiers mit konteners veur winkels makkelk tegen riepe omhoog kommen kinnen. Dit kin ook doan worden deur n apaarte schune rieperaand der tuzzen te ploatsen.

Etymologie[bewark | bronkode bewarken]

Middelkerwies komt t woord riepe van t latainse ripa, wat n laankrekte strook laand aan de raand van iets betaikent. n Riepe is den ook n laankrekte strook laand/grond dat noast n stroat ligt. Dit ripa komt ook veur ien ploatsnoamen zo as Zairiep bie Delfziel en Hardegariep bie Leeuwerd. t Woord Ripuarisch komt van dizze zulfde term, woarbie t verwiest noar de Rhain.

Leegsaksisch[bewark | bronkode bewarken]

  • Grunnegs: riepe, tiggelpad, ziedpad (nait stoup!)
  • Tweants:
    • ziedpad
    • trotwaar
    • tegelpad, teggel~, tiegel~