Oaverströymingen in Europa in july 2021

Uut Wikipedia, de vrye encyklopedy
Nå navigaty springen Nå söken springen

De oaverströymingen in Europa in july 2021 vönden vöäral plaatse in et noordwesteliken binnenland van Middeneuropa, med as gevolg enorme skade en enkele hunderden slachtoffers in Belgie, Düütskland, Frankryk, Italie, Luxembörg, Neaderland, Oustenryk, et Vereynigd Koaningryk en Switserland. De oaverströymingen waren et gevolg van anholdende reagenbüien dee op höär böärte veroorsåked wearen döär en lågedrükgebeed (koldepütte), dat dågenlange up syne plaatse blev. Meyrdere rivyren en bekken ströymden oaver. Med nåme de belgiske provincy Lüük en de düütske deylståten Noordryn-Westfålen en Rynland-Palts wearen swår etröffen.

Meyr as 200 lüde kwamen um by de natuurramp, under wee seyker 180 düütskers en 41 belgen. In Düütskland was dit de natuurramp med et gröytsten antal slachtoffers sinds den störmvlood van 1962.

Weadersümstandigheiden en oaversicht van de oaverströymingen[bewark | bronkode bewarken]

Satellyt- en rådarbealden van 8 töt 15 july

Sinds begin july 2021 kwamen warme, störmachtige winden uut Frankryk en Piemont en döär de låge ligging bereikeden nen kulen windströym uut et noorden Centraaleuropa. Dit resulteerden in en grout, relativ vast lågedrükgebeed döär den destyds swakken strålströym en ne trogweadersituaty;[1] gedurende meyrdere dågen waren der swåre reagen- en unweadersbüien, med sums hagel, in Oustbelgië, Noordryn-Westfålen, Rynland-Palts, Baden-Württemberg, Beieren, Saksen en in et noordwesten van Oustenryk en Switserland. Up vöäle plaatsen veroorsåkeden wåtermassas oaverströymingen in rivyren en beaken, groute materiele skade, gewunden en douden. Vöäle skade untstund döär wegespöölde brüggen en autos en döär inestörtede wöäningen en andere bowwarken. De wåterstanden van summige wåteren bereikeden vergelykbare höygden as tydens de oaverströyming van de Alpen in 2005 en de oaverströyming in Switserland in 2007 of oaverskreyden dee sölvs. Nå ümsgeväär ne weake lag et lågedrükgebeed boaven de oustelike Alpen, wår et langsåm vöälleep en in Oustenryk töt swåre oaverströymingen leideden.

In de verskillende etröffen regios verlepen de oaverströymingen anders. De neaderslag in summige barggebeden leideden töt ne enorme swelling van de rivyren en ne snel tonemmende, mår körte oaverströyming in den beneadenloup. Dårenteagen versåmelden et wåter sich langsåm up andere plåtsen souas de mearen an de rand van de Alpen in Switserland en in den beneadenloup van rivyren souas den Mås en den Ryn en bereikeden pas na enkele dågen de höygste wåterstanden. In summige dallandskappen sakkeden de vloodgölven nå enkele uren, terwyl de oaverströymingen in vlakke gebeden dågenlang anheelden. De oaverströyming was vöäral verwoostend in de Eifel, wår gebowen inklusiv infrastruktuur an de Ahr, et boavenste deyl van de Erft, de Rur en höäre syderivyren Inde, Merzbach en Wurm, wearen verwuusted.

Nuvola apps ksig.png Dit artikel is eskreaven in et achterhooksk.