Molotov-Ribbentroppakt

Stalin un Von Ribbentrop doot mekander de hande nå et underteykenen van et pakt

Et Molotov–Ribbentroppakt, officiääl et Neet-Anvalsverdrag tüsken Düütskland un de Socialistiske Sovjetrepublyken, was en neetanvalsverdrag tüsken Nazidüütskland un de Sovjetuny. Geheim deyl van et verdag was ne verdeyling van Ousteuropa tüskenbeide. Up 23. augustus 1939 underskreaven den düütsken butenlandsminister Joachim von Ribbentrop un den butenlandsminister van de sovjetten Vyacheslav Molotov et verdag. Unofficiääl nöömt se et ouk wal es et Hitler-Stalinverdrag, Nazi-Sovjetpakt of et Nazi-Sovjetverbund.

Et verdrag was et höygdepunt van de underhandelingen vöär nen ekonomisken afspraak tüsken de Sovjetuny un Nazidüütskland. Up den 22. augustus vlöög Ribbentrop når Moskou hen üm et verdrag to underskryven. De sovjetten hadden eyrst al med Frankryk un et Vereynigd Köäningryk üm tåfel eweasd. Den volgenden dag deaden se et Molotov-Ribbentroppakt underteykenen. Dårmed legden se vreyde tüsken beide landen vaste. Togelyke was et de afspraak dat ginne van de regeyringen et solde anleggen med nen teagenstander van den anderen.

Nöäst de bekendmakingen oaver de vreyde was der noch en Geheim Protokol. Dårin leaden se de grensen vaste van de sovjet- un nazi-invlood oaver Polen, Litouwen, Letland, Estland un Finland. Et geheime protokol hölde der ouk reakening med dat Litouwen wal belang had by de streake rund Vilnius. Düütskland verklården gin interesse to hebben in Bessarabie. Et geheime protokol wör al lange oaver eflüsterd, mär küm pas up tåfel to liggen by de Neurenbergprocessen.

Kort nå de underteyking völ Düütskland Polen binnen, up den 1. september 1939. Sovjetleider Josef Stalin sea syn leager üm Polen up den 17. september in to vallen, nen dag nå en staket-et-vürenverdrag med Japan nå de slagen van Chalchin Gol un nen dag nå at den Höygsten Sovjet et Molotov-Ribbentroppakt underskreav. Nå de invallen wör de nye grense vastesteld volgens et underdeyl Sovjet-Düütske Grensverdrag. Määrt 1940 greap de Sovjetuny deylen van de finske streaken Karelie un Salla, nå den Winteroorlog. Kort dårup volgden de inname van Estland, Letland un Litouwen un deylen van Romänie (Bessarabie, Noord-Bukovina un de Hertsa-streake). As smuusjen vöär den inval in Polen seaden de sovjetten dat se etniske ukrainers un witrussen wolden beskarmen. Stalin syne invasy van Bukovina in 1940 was ne skending van pakt, ümdat dåroaver gin afspraken emaked warren.

Et verdrag völ uuteynander up den 22. juni 1941, do as Düütskland Operaty Barbarossa begün un de Sovjetüny binnenvöl üm gestalte to geaven an et ideaal van Lebensraum. Et eyrstvolgende verdrag was et anglosovjetverdrag. Nå den Tweyden Wearldoorlog wör Ribbentrop by de Neurenbergprocessen ter doud veroordeyld vöär oorlogsmisdåden. Molotov küm in 1986 uut de tyd.

Uutwarking vandage

De poolske gebeden wat de Sovjetuny innöäm by de invasy van 1939 bleaven nå den oorlog in handen van de Sovjetuny. Rechtevoord höyret se by Ukraine un Witrusland by an. Litouwen kreag der Vilnius by. Rechtevoord hevt Rusland noch altyd westelik Karelie un Petsamo van Finland, Ingrie un de gråfskop Petseri van Estland un Abrene van Letland. Ouk de inenöämene gebeden van Romänie wörden de Moldaviske Sovjetrepublik of bepålde oblasts van Ukraine. Et grötste deyl van Bessarabie is nu Moldavie. Noordelik Bessarabie, noordelik Bukovina un de Hertsa sint nu et oblast Tsjernivtsi in Ukraine. Südelik Bessarabie is nu underdeyl van de ukrainske oblast Odessa.