Josef Stalin

Josef Vissarionovitsj Stalin (geboaren name: Ioseb Besarionis dze Jughashvili; 18. December [olden kalender: 6 December] 1878 – 5. määrt 1953) was nen politikman, politiken teorist un revolutionäär leider van de Sovjetuny van 1924 töt synen doud in 1953. Synen officiälen titel was Algemeynen Sekretåris van de Kommunistiske Partye van de Sovjetuny (1922 - 1952) un hee was vöärsitter van den ministerråd van de Sovjetuny (1941 - 1953). Hee was anhanger van Lenin synen uutleg van et Marxisme un makeden dat officiääl as et marxistisk leninisme. Syne eygene ideen nömet se Stalinisme.

Stalin wör geboaren in en arm georgisk gesin in de stad Gori in et governoraat Tiflis, deyl van et Russiske Ryk (wat nu Georgie is). Hee güng by de Marxistisk-Russiske Sociaaldemokratiske Arbeiderspartye in 1901. Et partyblad Pravda was he nen set redaktöör van. Ouk haalden hee centen binnen vöär Lenin syne bolsjewisten döär oavervallen, untvoringen un afpersking to organiseren. Hee wör verskeidene målen vastesat un verbannen når Siberie. Nå at de bolsjewiken an de macht kümmen nå de Oktoberrevoluty un ne eynpartyenståt makeden under de nye Kommunistiske Partye in 1917, güng Stalin by et Politbüro. Hee vöcht med in den Russisken Börgeroorlog un hülp in 1922 de Sovjetuny in de beyne. Stalin greyp de macht oaver et land nå et verglyden van Lenin in 1924.

Stalin drükkeden totaal socialisme döär. Hee bedachtden vyvjårenplannen, wårmed et land in müm van tyd industrialiseerden un de landbouw kollektiviseerd wör. De heyle ekonomy wör bestüürd vanuut et centrum van de macht. Dat vröär em up den emmer. Tüsken 1930 un 1933 kümmen der miljonen lüde uut de tyd döär hunger un uutpütting van et wark. Üm 'teagenstanders van de arbeidersklasse' up to rümen gavven Stalin updracht vöär de Groute Skounmaak, wårin miljonen gevangen wörden esat. Dee musten warken in gulags, dwangarbeiderskampen. Tüsken 1936 un 1938 wörden der noch es sou'n 700.000 lüde uut de weg erüümd döär veiligheidsagenten.

Stalin wolde med syn marxistisk leninisme internationaal den buur up. Hee understütden ouk europääske antifascistiske beweagingen in de jåren '30, un dan vöäral de Spaanske Börgeroorlog. In 1939 teykenden syn regime en neet-anvalsverdrag med Nazidüütskland, wat de weg vöär em vrymakeden üm Polen binnen to vallen. Nazidüütskland makeden en ende an et verdrag döär in 1941 de Sovjetuny an to vallen. Dårup haalden Stalin de bände an med de allieerden van den Tweyden Wearldoorlog un wör der eyne van de Groute Dree van. Et külden em noch eyrst vulleydig, mär et Roude Leyger van de Sovjetuny wüst uutendelik de düütske anval af to holden un Berlyn in to neamen in 1945. Dårmed makeden se en ende an den Tweyden Wearldoorlog. Undertüsken veröäverden se baltiske ståten un et domålige Bessarabie un Bukovina (in et hüdigendaagse Romenie un Ukraine). Sou stichten se sovjetgünstige ståten in Midden- un Ousteuropa un deylen van Oustasie. De Sovjetuny un de Vereynigde Ståten kümmen uut den oorlog as wearldmachten, dee gin beste möäge warren. Et voorden to den Kolden Oorlog. Under Stalin untwikkelden de Sovjetuny nen atoombom in 1949. Undertüsken leyd et volk hunger un leidden jöädenhaat töt et doktersplan. Nå Stalin synen doud wör Chrusjtsjev leider. Den veroordeylden Stalin syne misstanden un begünde ne untstalinisering van et land.

Stalin wördt wyduut as eyne van de invloodrykste figuren van den 20. eywe seen. Der wör ne heyle persöönsvereyring rund em upetüügd, as de held van de arbeidersklasse un et socialisme. Nå et uutmekandervallen van de Sovjetuny in 1991 is Stalin under groute grupen lüde noch altyd populäär in Rusland un Georgie. Se seet em as nen starken oorlogsleider den van Rusland nen wearldmacht wüst to maken. Undanks dat wördt syn bewind stark veroordeyld as diktatoriaal. Hee wördt verantwoordelik acht vöär massale volksunderdrükking, volkermoord, volksafvoring, hunderddusende todoudbrengingen un hungersnouden wårby miljonen störven.