Moderspråke en Nåberschůp

Uut Wikipedia, de vrye encyklopedy
(döärstüürd vanaf "Modersproake en Noaberschup")

Moderspråke en Nåberschůp (ok eschreven as Modersproake en Noaberschup) was een Nedersaksisch literair tiedschrift det begund wördden in Hengel in september 1958 en daoras zes ofleverings van verschenen. 't Tiedschrift wilde wieder gaon in de trant van 't Swieniegeltje, 't vanuut Grunning uutegèven internationaole Nedersaksische tiedschrift det in 1961 uutscheidden.

De uutgever van Moderspråke en Nåberschůp was Gerhard ten Holt, die in 't tiedschrift schreef: 'Et müt 'n tiedschrift wödden föör et Volk van Münsterland - Graafschup Benthem - Emsland - Gelderschen Achterhook - Twente en Salland.' Hi'j mienden det Nederlaanders en Duutsers uut 't gebied tussen Iessel en Eems een schakel kunden wèden in de kette tussen Hollaanders en Hoogduutsers, en tussen Nederlaand en Duutslaand in 't algemien. Det idee was ok al deur de Benthemer taalkundige Arnold Rakers uutedragen.

't Tiedschrift, det edrokt wördden deur Johan Gigengack, wol bi'j veurkeur de Vosbergenschriefwiese gebruken, de mandielige spelling veur Nederlaandse en Duutse schrievers in 't Nedersaksisch. Mitwarkers waren onder aandere Gerard Vloedbeld, Arend Lamm, Toon Borghoes en Mien Hagreis-Post uut Twente, Karl Sauvagerd en Lucie Rakers uut de Graofschop Benthem en Gudrun Münster van bij Hambörg weg.

Deur slimme ziekte van Ten Holt mus Moderspråke en Nåberschůp in 1961 nao zes ofleverings uutscheiden.

Literetuur[bewark | bronkode bewarken]

  • Hendrik Entjes (1990). 'Streektaalliteratuur in Overijssel na 1945', in Jurjen van der Kooi (red.), Dialectliteratuur: balans en perspectief van de moderne streektaalletterkunde in Oostnederland en Nederduitsland: een bundel studies, Stad: Sasland
  • Helmut Lensing (2021), 'Die Grenzüberschreitende Niederdeutsch-Bewegung in den Jahren nach dem Zweiten Weltkrieg in der Region Emsland/Grafschaft Bentheim und den östlichen Niederlanden', in Henk Bloemhoff en Henk Nijkeuter (red.), Jaorboek Nedersaksisch 2 (2021), Oosterwoolde: Stichting Sasland, pp. 109-147
  • Johan Gigengack: Kring van vrienden en bekenden
Dit stok is eschreven in 't Zuudwest-Zuud-Drèents van de Drèents-Oaveriesselse grèensstreek.