Messiasbeliedende Jeuden

Messiasbeliedende Jeuden bint 'n godsdienstige gruupering die Jezus beschouwt as n deur God in n Olde Testement beleufden Messias. Messiasbeliedende Jeuden döt in eur geleufsleven aspecten uut zowel 't kristendom as 't jeudendom saamn.

Aandere benaamings veur Messiasbeliedende Jeuden bint Messiaanse Jeuden, Messiaans jeudendom, Messiaanse Beweging en Messiasbelieders. De leste twee anduudings wöd ok in gebruuk enommen deur Messiasbeliedende niet-Jeuden.

Körte umschriewing

Deur eure geleuf in Jezus as 'n messias (deur eur an-eduud as Yeshua of Jesjoea, zien Hebreeuwsen naame) zollen Messiasbeliedende Jeuden in strikten zinne as kristenen kunnen wödden an-emarkt, mar disse tarme wödt deur eurzölf liever nie gebruukt. Formeel espreuken beheurt zi'j echter töt 'n kristendom. Zölf vint zi'j dat eur (ok) töt 'n jeudendom beheurt, mar umdat Jezus deur 'n jeudendom nie as messias wödt eziene, beschouwt 'n jeudendom hen as 'n kristliken sekte. 'n Aander probleem is ok, dat de Messiasbeliedende gruuperings 'n jeudendom nao Jezus ofwiest. In 'n jeudendom geleuft men nie dat Jezus an 'n Messiaanse profetieën hef voldaon, noch voldöt an de vereisten die an de messias esteld wöd en dat daorumme de messias, wiens identiteit nog onbekend is, nog mut kommen.

In 't kristendom bint d'r meer gruupen die elementen uut 't jeudendom en 't kristendom saamdoet. Men kan hierbi'j deanken an de Zeuvendedagsadventisten (disse hold de sabbat), maa veural ok an wat wel de Messiasbelieders of de Messiaanse Bewieging wördt enuumd. Eewm as de oovrige zichzölf nuumende Messiasbeliedende gemienten, giet 't hierbi'j ienvoldigweg um niet-Jeudse kristenen die op Judaistische wieze eur geleuf vörm gef. Men gebruukt de tarms Messiasbelieders en Messiaanse Bewieging daorumme gwoon as verzaamelbegrip. De diverse "Messiaanse" gruuperingen hebt verschillende, teengstriedige visies, en van ien laandlik Nederlaanse saamwarkverbaand is dan ok gien sprake.

Dit artikel is eskreaven in et sallandsk.