Gerard Vloedbeld

Gerard B. Vloedbeld, ok wa op zien Twents: Vloodbeld^[1] (Ambt Almelo, 9 meert 1884 - Almelo, 17 november 1961) was nen skriever den at zik drok maken vuur de Twentse sproake. Hee skreef oawer geskiedenisse, tradities en gebroeken van Twente. Ook was he nen zet betrökken biej 't Swieniegeltje, een skrieversblad van een intersaksisch skrieversverbond.

Leawnsbeskriewige

Vloodbeld wör meesttieds anesprökken as 'Meister Vloodbeld', umdat dat zien feitelike beroop was. Veertig joar lange was he boavenmeister in Almelo.^[2] Vanof 1907 skreef hee vuur de Twentsche Courant. Do at dee krante verkocht wör noar Oldnzel, har Roomsk Almelo ginne krante mear. Doarumme begun Vloedbeld met drukkerieje Lulof in 1921 de Nieuwe Twentsche en Almelosche Courant, woervan at de bladziedes vuural duur umzelf evuld wörden. Hee har do al wat kunnigheid met et verleden van Twente. Heanig an wör he mear nen anpriezer van de Twentse sproake en gebroeken, en vlot skriewer van et Twents.

In de joarn '30 skreef Vloodbeld fel tegen et nazisme, woerdoer at de krante tiedens de bezettige verböaden wör. In dee tied begun he skriefkunstig woark umme te zetten op zien Twents, um an te teunen at Twents ne 'volle sproake' is, woerin as der ruumte is vuur skriefkunst. Doarumme wörd he wal ezeen as 'n eersten den at et Twents op een heugerder plan probeerden te kriegen. Ene van ziene bekendste woarken is et komische Mans Kapbaarg, 'n grootsten leugenbuul van 't Tukkerland, wat verskeidene moalen vanniejs edrok wör. Mans Kapbaarg wör as ne oard stripverhaal verwoarked in een 150 meter lank mozaïek an nen tunnelwand an de Wierdensestroate in Almelo.

Vloodbeld har völle bestuurlike functies. Zo was hee oprichter en eersten vuurzitter van 'n Twentsen Skrieverskrink, en redakteur van Twènterland en -leu en -spraoke.

Skrieverieje

Geschiedenis der Katholieke Kerk in tijd- en levensbeelden. Almelo, J.T. Sommer, 1912
Mans Kapbaarg, 'n grootsten leugenbuul van 't Tukkerland. Boorn, ten Tusscher, 1927
Ummezettings oet t Duuts van t woark van Augustin Wibbelt: Het veerde gebod, In oorlogstied (2 delen), Wildrops Hof, De Noalaotenschop. Oet ekömn in de joarn twentig bie Smit (Hengel) en Lulof (Almelo)
Schriewers in de Twentse Sproake. Almelo, van der Veen, 1954
Elckerlick in Twentse Sproake. Hengelo, Gigengack, 1960
Klootscheeterswedstried. Eanske, Witkam, 1969
Twentse Holskrabbels. Eanske, Witkam, 1969
Aole könnigheid. Eanske, Witkam, 1976
De Eawengellies van Mattheus, Marcus, Lucas, Johannes aoverzet in de Twentse sproak. Eanske, Witkam, 1984

Bronnen

↑ Beveurbeeld in Twenteland en leu en spraoke, nr. 7, 4e joargaank, 1959
↑ Ok t Handboek Nedersaksische Taal- en Letterkunde sprek van 'Meester Vloedbeld': Henk Bloemhoff, Jurjen van der Kooi, Hermann Niebaum en Siemon Reker (red.) (2008), Handboek Nedersaksische Taal- en Letterkunde, Assen: Van Gorcum, p.386

[1] Beveurbeeld in Twenteland en leu en spraoke, nr. 7, 4e joargaank, 1959

[2] Ok t Handboek Nedersaksische Taal- en Letterkunde sprek van 'Meester Vloedbeld': Henk Bloemhoff, Jurjen van der Kooi, Hermann Niebaum en Siemon Reker (red.) (2008), Handboek Nedersaksische Taal- en Letterkunde, Assen: Van Gorcum, p.386

[1]

[2]