Man van Loschbour

Uut Wikipedia, de vrye encyklopedy
Nå navigaty springen Nå söken springen
Skelet van de man van Loschbour
Wår et skelet evünden isse

De man van Loschbour, ouk wel man van Loschbur, is en ungevear 8000 jår old skelet van en Homo sapiens üüt et Europeesk Mesolithicum. Et skelet is in 1935 evünden in Müllerdal, in de gemeynde Waldbillig in Luxembörg.

Geskiedenisse[bewark | bronkode bewarken]

Et skelet, det bynå kompleet is, weer evünden up 7 oktober 1935 onder en Abri up de rivyruvers van de Swarte Ernz. De man van Loschbour weer evünden döär amatöör-archeoloug en skoolmeister Nicolas Thill. Et skelet is nu te vinden in et Nationaal Museum van Natuurhistory in Luxembörg stad.

Leaven[bewark | bronkode bewarken]

De man van Loschbour was en jager-versamelaar. Vüürsteynen, gerei vöär et doden van wilde deren, bint by syn lichaam evünden. Wårskynlik was hee eyn van de lätsten in syn regio dee an jagen-versamelen deed, ümdet nye volker in et gebeed kwamen dee eyrder schepers waren as jager-versamelaars.

Volgens DNA-testen dee edåne bint in 2014 was et skelet van en man, dee ümskreaven wördt as 'a light skinned (white) individual' (intermediate huudskleur med en kans van 90%) med brun of swart hår (98%) en wårskynlik blauwe ogen (56%). Terwyl now 90% van de Europeanen melk drinken kan, kon hee det neet. Tun as hee üüt de tyd kwam, was hee tüsken de 34 en 47 jår old. Hee was sou'n 1,6 meter lange en wöög tüsken de 58 en 62 kg. Det gev en BMI van 22,7 töt 24,2.

Körtby de man an Loschbour bint de wårskynlike resten van en volwassen vrouwe evünden. De vrouwe is ekremeerd. Up de botten waren bewysen te vinden det et lyk ontvleist was.

Olderdom[bewark | bronkode bewarken]

De man van Loschbour leavden sou'n 8000 jår eleden. Et bint de oldste resten van en means evünden in Luxembörg. Syn Y-DNA Haplogrup was I2a-M423*. Üüt DNA-testen üüt twey kusen was of te leiden det westeuropeeske jager-versamelaars souas de man van Loschbour byedragen hebt an et DNA van Europeanen, maar neet an det van lüü in et Midden-Ousten.

Media[bewark | bronkode bewarken]

In 2014 is en 3D rekonstrukty van de man van Loschbour emaakt.

Nuvola apps ksig.png Dit artikel is eskreaven in et sallandsk.