Keunstklookte

Kunstklookte, kunstklookheid, masjinenverstand of kunstmoatige intelligensie is klookheid in masjines. In de komputerwetenskap neumt ze onderzeuk noar kunstklookte studies oawer "kloke agenten": apparaten dee öare umgeving bekiekt en doarop öar handelen anpast um ne opdracht et beste oet te voren. Veur gewone leu wis de term "kunstklookte" op ne masjine met "verstandelik" vermogen, wat leu met et menskelike verstand liekent, zo as "learen" en "problemen oplössen". Noe dat masjines verdan mear könt, wordt verstandelike meugendheden neet mear metrekkend woarvan eerst meand wör at ze klookheid neudig harren. Karakterherkenning is bie veurbeeld zo gewoon wörden dat et neet länger geldt as "keunstklookte". Meugelikheden dee op dit ogenblik as kunstklookte te book stoat zint onder mear natuurlik sproakbegrip, hoogweardig stried leaveren in strategiese spellen (zo as schaken en Go), zelfsteurende auto's, kloke wegbepoaling in Content Delivery Netwarken en et oetpluzen van ingewikkelde gegeavens.

Wetenskap

Onderzeuk noar kunstklookte is opdeeld in deelvelden dee kiekt noar bepoalde problemen, spesifieke benöaderingen, noar et gebroek van gerei, of noar et veurthelpen van bepoalde toopassingen.

De heufdproblemen van kunstklookte umvat redenering, kennis, zelfsteurend plannen, learen, natuurlike sproakverwarking, beleaving en de meugelikheid um dinge te verplaatsen en an te passen. Algemene kunstklookte is ene van de doelen op langen doer. Doarveur broekt onderzeukers statistiek, rekkenkundige klookte en tradisjonele symboliese kunstklookte. In kunstklookte wörd völle gereedskappen broekt, zo as zeukopdrachtverbettering en rekkenkundige verbettering, logika, woarskienlikheidsrekkening en ekonomie. Bie kunstklookte sprekt wetenskappen van komputers, rekkenlear, psychologie, sproaklear, filosofie, neurowetenskap en kunstpsychologie an.

Fantasie, filosofie, geskiedenis

Dit veld wör grondt op de bewearing dat menskelike klookte "zo nauw beskreven worden kan dat der ne masjine bouwd kan worden um et noa te doon". Hierbie komt filosofiese vroagstukken lös oaver de oard van et verstand en de ethiek van et maken van kunstweazens met menskelike klookte. Hieroawer wörd al sind de oldheid filosofeerd in verhalen en filosofie. Wat leu meant at kunstklookte ook gevöarlik veur de mensheid wean kan as et zonder steuring wiedter ontwikkelt.

In et 21ste joarhonderd hebt zowal harde as zachte kunstklookte ne opleaving kregen deur ne verbettering van komputerkracht, umvang van oefensets en theoreties begrip. Kunstklooktetechnieken zint onmisboar wörden in technologie. Et helpt völle oetdagingen oplössen in komputerwetenskap.

Naamherkomst

Den Twentsen naam kunstklookte is ne letterlike umzetting en samentrekking van et Engelse artificial intelligence. In 2017 wun "kunstklookte" et met 26/20 stemmen van kunstmoatige intelligensie in ne Facebook- en Twitter-stemming oawer de juuste umzetting van et woord.