Keet

Uut Wikipedia, de vrye encyklopedy
Nå navigaty springen Nå söken springen
Disambig-dark.svg Dit artikel giet oaver de keet as jongerenhonk. Of zöch ie een artikel oaver bouwketen?

Een keet is op het plattelaand een honk veur jongen rond de tienerleeftied, det ze miestentied zölf beheert. 't Is miestal een schure, slephutte, etummerd hok of zokswat achter op 't arf van de olders van ien van de jongen. De jongelu - groepen van een paar vrunden töt zo'n twintig jonges en maagies - koomt daor geregeld samen umme te praoten, meziek te luustern, te kieken naor evenementen as voetbalwedstrieden en te roken en drinken. In kleinere plaatsen daoraj niet veule horeca viendt, is de keet een alternatief veur de kroeg, de discotheek of nog wat aanders.

Keten in dizze zin bint veural een bekend fenomeen in Frieslaand, Oaveriessel en de Achterhoek. Partie radiopiraten hebt een keet van waoruut ze meziek uutzendt.

Kiek op keten[bewark | bronkode bewarken]

Jongerenketen bint veule in 't ni'js ewest umdet d'r gloepens veule drunken zol wörden.[1] Keten hebt vake een bar en stelt priezen vast veur de draank, die wördt in-eköcht veurdet de jongen bi'j menare koomt.

Deur de negatieve berichten oaver comazoepen in de keten, hebt ze een negatieve klaank ekregen. Mar d'r bint ok positieve kaanten te numen an 't bouwen en beheren van een keet. Zo wördt ze vake bouwd deur de jongelu zölf, die dus moet sparen veur de materiaolkosten en ervaring opdoet mit constructiewark. Partie jongeren die an een keet bouwt starkt heur vakmanskop vanuut een technische opleiding. Wieders hebt keetbezitters verantwoordelijkheid veur 't volk det oaver de drumpel kump.

Ok hebt de keten in kleine dörpen zonder veul uutgaonsgelegenheid een sociaole stee. De jongelu koomt hier bi'j menare en vörmt grote vrendengroepen. Ook maagies koomt noar de keten, en jonges en maagies leert menare d'r kennen.

Tègenstriedige berichten[bewark | bronkode bewarken]

Deurdet onderzuuk naor keten steekproefsgewies gebeurt, en het dus een momentopnaome is, blieft de berichten oaver 't bield van de drinkketen tègenstriedig. Zo viej in de Twentse Courant Tubantia op 18 september 2008 twei berichten oaver drankketen: in 't eerste artikel hef de gemiente Tubbargen (Noord-Twente) besleuten een drinkkeet te verbieden naodet een veertienjaorige jonge in 't ziekenhuus op-eneumen weur,[2] mar in dezölfde kraante stiet een bericht det in de acht keten rondumme Vriezenveen gien uutgebreide zoeperi'je plaatsviendt.[3] Deur zokke tègenstriedige berichten blif 't bield det de lu hebt van keten nog aorig negatief.

Augustus 2011 weur in de umgèving van de Twèentse gemiente Riesn-Hooltn een verkiezing heulden van wie as de mooiste keet hef.[4]

Nedersaksisch[bewark | bronkode bewarken]

Rifferenties[bewark | bronkode bewarken]

  1. Mark van Wonderen: Jongeren op platteland drinken te veel, planet.nl, 31 meert 2005
  2. Twentsche Courant Tubantia: Tubbergen sluit drinkkeet na opname 14-jarige jongen
  3. Twentsche Courant Tubantia: 'Geen excessen in acht drinkketen'
  4. De Weekkrant. Wie heeft de mooiste keet?. 16-08-2011.

Uutgaonde verwiezing[bewark | bronkode bewarken]

Nuvola apps ksig.png Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.