Jan Roelof Westerhuis

Jan Roelof Westerhuis (schoelnamen: Gerriet Wilms, Gerard van Elburg) (Nei-Bunen, 7 december 1926 - De Wiek, 11 juli 1999) was ambtenaor, dichter en recensent van Drèentse skrieveri'je.

Westerhuis studeerden economie ien Grunning. Op 't Ministerie van Landbouw was hi'j verantwoordelijk veur laandbouwonderwies. Hi'j woonden ien Voorburg (Zuud-Hollaand) en nao zien pensionering ien De Wiek.

Dichter en recensent

As Gerard van Elburg skreef e Nederlaandstalige gedichten ien 't studentenblad Minerva, daoras e ok redacteur van was. Ien Oeze Volk en aandere tiedskriften publiceerden hi'j gedichten ien 't Drèents. Veural weur hi'j, ok buten Drenthe, bekend as recensent van Drèentse en wiedere Nedersaksische skrieveri'je, dit onder de name Gerriet Wilms. Veur de Regionale Omroep Noord en Oost (later Radio Noord) maakten hi'j ien de vrogge jaoren vieftig 't literaire programma De Drènse (Drentse) Parnassus. Later skreef e ok recensies van Drèentse gedichten veur de rubriek Te kust en te keur van Hans Heyting, die de teksten veurlas. Ien Maandblad Drenthe had e een vast stokkien, "Dichters en zondagsdichters bekeken door Gerriet Wilms". Deur Westerhuis zien wark gruuiden 't idee bi'j partie skrievers om een skrieversveriening op te richten. Ien 1953 hölp Westerhuis mit de Drentse Schrieverskring op te richten; hi'j weur de eerste veurzitter.

De bloemlezing Scheupers van de taol nuumt Westerhuis "de eerste echte recensent van Drentse schrieverij" ^[1], mar 't overzichtswark Drèentse schrieverij skrif: "echt kritisch was e niet." ^[2]

Biograaf

Literatuurhistoricus Hendrik Nijkeuter markt op det Westerhuis en Harm Werners (Gerard Nijenhuis) ien biografische besprekings van Drèentse skrievers veur Maandblad Drenthe "minder fraaie zaken met de mantel der liefde" hebt bedekt (bespreuken wördt de skriever J.J. Uilenberg, die lid ewest had van de NSB en de Kultuurkamer). Nijkeuter nuumt dit een "onprofessionele aanpak", mar skrif d'rbi'j: "Hadden zij anders gewild, dan hadden zij wel tegen een bijzonder sterke stroom moeten oproeien". ^[3]

Ien 1991 weur onder Westerhuis zien eindredactie Ruinerwold, rondgang door het verleden uutegeben.

Westerhuis zien Drèentstalige wark is niet ebundeld, mar stiet ien bloemlezings zoas Mandielig (1983) en Scheupers van de taol (2003), daor a'j zien gedicht Winterdag ien vienden.

Rifferenties

↑ Broersma, Rouke (red.) (2003), Scheupers van de taol: Bloemlezing van de Drèentse Schrieverij 1837-2003, Zuudwolde: Stichting Het Drentse Boek (p. 120)
↑ Boerma, Stieneke en Rouke Broersma (1993), Drèentse schrieverij, Zuudwolde: Stichting Het Drentse Boek (p. 53)
↑ Nijkeuter, Hendrik (2001), De "pen gewijd aan Drenthe's dierbren grond" : literaire bedrijvigheid in de Olde Lantschap, 1816-1956, Grunning: RUG (dissertatie, p. 527)

Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.

[1] Broersma, Rouke (red.) (2003), Scheupers van de taol: Bloemlezing van de Drèentse Schrieverij 1837-2003, Zuudwolde: Stichting Het Drentse Boek (p. 120)

[2] Boerma, Stieneke en Rouke Broersma (1993), Drèentse schrieverij, Zuudwolde: Stichting Het Drentse Boek (p. 53)

[3] Nijkeuter, Hendrik (2001), De "pen gewijd aan Drenthe's dierbren grond" : literaire bedrijvigheid in de Olde Lantschap, 1816-1956, Grunning: RUG (dissertatie, p. 527)

[1]

[2]

[3]