J.B. Klönne
Jan Berend Klönne (Klazieneveen, 7 meert 1942) is een schriever uut de Nederlaandse pervincie Drenthe.
As jonggien al schreef Klönne um hum een eigen wereld te schöppen. Hij wol arts wörden, mar mus as oldste zeune op zien veertiende as veenarbeider in Duutslaand an 't wark. Daornao warkte e as boerenknecht, heftruckrieder, mesienebaank-warker en alderdeegs ok as goochelaar en clown. Zien tweede vrouwe fieterde hum an um de havo te doen en te gaon schildern.
Via de schriever Dick Blancke kwaamp Klönne bij Drèents letterkundig tiedschrift Roet terechte, daor as e in de jaoren tachtig en negentig gedichten en verhalen in had staon. Ok stund wark van hum in 't tiedschrift Oeze Volk en warkte e mit an 't Radio Drenthe-pergramme 'Boenders en Bössels'. Aover zien schrieverije hef e ezegd: "Ik streep alles weg wat der teveul stiet. Der blef alleen een karkas over, zoas in mien verhaal 'Zonder titel'. Ik wil alleen 't naakte overholden!"
Bronnen
[bewark | bronkode bewarken]- Rouke Broersma (red.) (2003), Scheupers van de taol: Bloemlezing van de Drèentse Schrieverij 1837-2003, Zuudwolde: Stichting Het Drentse Boek (blz. 214-215)
- Henk Nijkeuter (2016), Waor roet en blommen wortel schiet in 't veld. Geschiedenis van de Drentse literatuur 1945-2015, Beilen: Het Drentse Boek (blz. 286-287)
|
Dit artikel is eschreven in 't Zuudwest-Drèents. |